台灣資深女星甄珍噚日凌晨因為又暈又嘔，被送入醫院接受治療。甄珍上星期四喺高雄舉辦經典影展，連日嚟不停出席宣傳活動，又因為邀請多位好友撐場，身為主人家嘅佢擔心對捧場嘅藝人朋友招呼不周，凡事親力親為，連航班同交通都要親自打點，結果因為操勞過度，前晚覺得唔舒服，頭暈兼嘔吐，凌晨由助手叫救護車送佢入醫院。睇完醫生後，甄珍已出院返酒店休息。
操勞過度
前日早上，星馬粉絲為即將踏入72歲嘅甄珍預祝生日，老拍檔秦祥林都有出席祝賀。下午甄珍喺高雄舉行簽書會，當時氣色唔錯，仲開心做訪問分享影展趣事，估唔到半夜突然唔舒服，凌晨入高雄醫學大學附設醫院睇醫生時，個樣仲好憔悴，不過休息一晚之後，已經好咗啲。
甄珍助手阿蓉同台灣蘋果新聞網講，醫生幫甄珍打咗支止嘔針，跟住做咗啲檢查，直至差唔多半夜四點至做完所有檢查，血小板同紅血球都正常，但仲要詳細檢查至知道病因。甄珍仍然好虛弱，可能因為最近太操勞。之後阿蓉再代甄珍回覆話：「好多了，已經出院，謝謝關心。」
撰文：馮仁昭
