無綫新聞報道反送中示威嘅手法，俾唔少網民同巿民質疑偏幫政府同警察，之前網民就發起行動，呼籲廣告商杯葛喺無綫落廣告，亦有地產舖表明唔再播放CCTVB新聞報道。
就連曾經做過無綫新聞主播嘅民主派議員毛孟靜，最近都對無綫記者嘅問題好有意見，噚日更激動到拍枱，因為毛姨姨已經唔係第一次遇上CCTVB問啲挑機同有預設嘅問題。
話說噚日無綫記者出席民主派回應前日沙田衝突記招時，問毛姨姨睇到有示威者用鐵通同遮襲擊警員時有乜個人感覺？又問佢係咪唔會同呢啲所謂暴力行為切割並作出聲明？
「我哋不割席」
毛姨姨聞言即激動話：「民主派再一次聲明，我哋不割席！任何嘅暴力畫面，冇人會喜歡睇到，但係噚晚我哋喺沙田新城巿廣場睇到嘅嗰場困獸鬥，係全香港巿民公道自在人心嘅！講完！」記者會結束後，毛姨姨問返提問嘅記者：「請問你係邊度㗎？」記者答「TVB」後，毛姨姨忍唔住激動拍枱：「次次都係TVB㗎喎！」繼而轉身離開。