曾幾何時，曼市雙雄嘅實力差距存有鴻溝，不過自從費格遜爵士退咗落嚟之後，曼聯嘅實力就不斷下跌，家陣淪落到連瑞士嘅年青人、西甲嘅雷加利斯都不如？英媒《太陽報》日前轉載一個由網站FiveThirtyEight做嘅調查分析報告，其中紅魔喺全球足球球會排名榜上竟然只排第34位，你話差過曼城、利物浦就算正路，排名仲低過年青人、雷加利斯呢啲球隊，似乎又過份咗啲，到底FiveThirtyEight係點計嘅呢？
同市宿敵曼城排榜首
就話，佢哋嘅主編自2009年起已經開始為足球隊評級，仲從ESPN同網上儲存庫中，收集咗自1888年起超過55萬場嘅比賽數據。佢哋會計算出全球634支球隊，每支球隊進攻同防守級別嘅評分，最終會預測每支球隊喺中立場上，面對一支評分普通的球隊時嘅入球同失球數，最終形成一個排名積分榜。
英超曼城場均攻入3球、失球只得0.2球，以94.4分排喺呢個排名榜榜首，另外德甲拜仁慕尼黑、英超利物浦同西甲巴塞隆拿都拎到90分以上，至於主角紅魔場均攻入2.2球、但失波就有0.8球，只得75.7分排喺第34位，唔只係英超Big 6中最差，排名仲衰過愛華頓、西甲伊巴、基達菲、雷加利斯，甚至連瑞士嘅年青人都比曼聯高一位，如果曼聯新季再唔爭氣，排位仲可能會繼續下跌！
傳7.9億簽馬古尼
當然紅魔想喺新球季反彈，買人增強實力梗係事在必行，英國《太陽報》最新消息就話，曼聯已經同意加碼到8,000萬鎊，即大約成7.9億港紙，買入踢緊李斯特城嘅英格蘭國腳哈利馬古尼，其中6,000萬鎊會即畀，另外2,000萬鎊就係浮動附加費，仲講到馬古尼禮拜一就會飛到曼徹斯特體測，如果最終成事，26歲嘅馬古尼就會超越上年以7,500萬鎊，由修咸頓加盟利物浦嘅華基爾雲迪積克，成為世界最貴後衞！