【本報訊】香港告急，年輕人勇於站出來。繼五年前雨傘運動後，中文大學醫學院六年級學生、準醫生陳禕程再次成為義務急救員。這五年間，香港法治、人權不斷被蠶食，民選議員被DQ，送中惡法更會斷送一國兩制，她不忘傘運時傳遍醫學院的一句話──「上醫醫國、中醫醫人、下醫醫病」。白袍之外，為了公義，她甘冒被捕和受傷風險，再次走上街頭，貢獻所長，「如果係正確嘅事，應該要出聲」。
陳禕程在反送中運動中擔任義務急救員，協助招募急救員時也告知有意參加者，急救員可能與示威者一樣有被捕甚至受傷風險。事實非危言聳聽，警方發射其中一枚催淚彈，擊中一個急救站前方，更有任急救員的同學治理傷者時被警方包圍，「做完個case（傷者），我哋個同學問阿Sir（警察）話想走，先開條路窄窄地畀佢走」。
「影響我家園要出聲」
在今次逆權運動中，陳禕程感受到警方敵視市民的程度遠較傘運時嚴重。6.12當日她身穿黑衫，手臂貼上紅色十字，與友人購買了三袋急救物資，包括紗布、生理鹽水、口罩及一箱蒸餾水，原想乘港鐵送去灣仔，但得悉港島多個港鐵站都有警察截查市民，二人便在油麻地站出閘改乘巴士前往，但在油麻地出閘後仍被四名軍裝截停，帶到牆角問話。
「佢（警察）問我哋攞身份證，好唔友善咁問我嗰幾袋係乜嚟，我照答，跟住佢逐袋摷，摷得好仔細」。明明紙箱已寫上是蒸餾水，仍遭盤問，「警察問拎住箱水去邊」，她沒回答，警察則不斷查問，令她非常無奈，「成個過程畀我感覺警察好唔友善，雖然我着住黑色衫，係唔係黑色衫拎住咁多物資，就一定要查呢？」
逆權運動剛開始時，警方曾在金鐘港鐵站內勒令多名年輕人靠牆一字排開示眾，逐一搜身。今次輪到自己親身經歷，陳禕程不禁質疑，全民被當賊辦，「其實係唔係真係要咁唔友善對待香港市民？我覺得呢場運動本來矛頭唔係對住香港警察，𠵱家有人將矛頭對住警察、圍警總，其實係佢哋自己攞嚟」。
每當香港危急時，市民總會選擇以不同方式抗惡法、反暴政。陳禕程則選擇以自己的醫學知識，在兩場大型社會運動盡一分力。她說，當初決定做急救員，曾感害怕，但仍堅持站出來，因為深信是在做正確的事，「其實好多謝呢個社會畀咁多挑戰我，你唔經歷過一啲你需要掙扎嘅情景，就唔會知道第時應該點處理呢啲掙扎」。
反送中惡法未撤回，警方大搜捕也未休止，陳禕程坦言，曾擔任急救員且公開接受訪問也有風險，「始終𠵱家差佬乜都做得出㗎啦，我露過面，甚至乎公開過自己身份，佢嚟搞吓我都唔出奇」。但年僅22歲的陳禕程，在反送中運動中看見許多更年輕的面孔，提醒她勿忘初衷，「因為民主運動冇可能係一朝一夕，大家都會老，都會攰。𠵱家見到咁多比我年輕嘅手足出嚟，真係好開心」。
經歷過傘後失落，這次全民抗爭讓她的信念更堅定，在白袍之外要為公義發聲，正如《逃犯條例》修訂，看似事不關己，但衝擊一國兩制，「影響我家園都應該要出聲」。
現時她就讀中大醫學院六年級，明年才畢業，但已時刻提醒自己，將來穿起白袍必須中立，但放下白袍應關心社會，幫助弱勢社群，「如果有能力都唔去做，咁邊個去做？」即使未看到盡頭，前路茫茫，只要相信所做的事是正確，便應繼續向前行。
■記者陳沛冰