林嘉欣15歲入行，時光荏苒，現為兩女之母。下月踏入41歲的她，從《男人四十》引誘老師出軌的學生妹，到如今所演的角色不是人妻就是人母，面對殘酷的現實，她生性樂觀，反過來試着說服別人：「我呢個歲數，唔通做學生咩？」又大談婚姻之道，指溝通好重要，不會將心事帶過晚上12時。
林嘉欣細數從《男人四十》以來，戲路一直多變，「驚慄又得，鬼片又得，次次唔同，揀戲路都好吃力，做演員好被動，有啲嘢未做過好想嘗試。」她舉例將於明天上映的電影《掃毒2天地對決》，跟劉德華合演夫妻，大家相識多年卻首次合作，自然挑起興趣。
同劉德華有默契
嘉欣說：「諗唔到識咗咁多年，出奇地冇合作過，我哋第一場戲就嘈交，場戲係難，冇一個過程，一開始就要鬧，印象深刻。」演出效果出奇地有默契，她覺得這有賴於雙方的投入，絕對有火花。事實上，劉德華也多次讚賞她的表現，嘉欣沒有沾沾自喜：「佢唔知我背後做咗幾多嘢，我驚自己處理唔到，做咗好多功課，希望大家滿意。」
《掃毒2》中嘉欣和劉德華的故事主要描述夫妻間溝通，她坦言溝通好重要，兩個大人之間、關於小朋友教養，必須不斷地溝通，「如果我有嘢放喺心，係唔會容許超過12點，我要攞出嚟講，舒服我先瞓到。好彩我係瞓得食得嘅人，我瞓唔到就好大件事，溝通係要一齊成長。」
維繫婚姻靠包容
嘉欣和導演袁劍偉結婚多年，談到夫妻間應否有秘密的問題，她直言：「當然可以，唔會有人完全認識你，我都未必完全認識自己，女人喺唔同階段都會變，我容許有秘密，我都唔介意佢有秘密，好難要求有人完全明白自己，冇傷害性係可以。秘密唔係隱瞞，問我都會講，唔問我就唔講。」
包容是維繫婚姻的最大要素，嘉欣認為經歷多年婚姻關係後，彼此會變得不再吸引，需要互相包容，她笑言：「我都唔會365日都咁吸引㗎！」提到她在戲中因不能生育，丈夫有私生子，嘉欣直言現實絕不能接受：「有邊個會接受呢？不過，任何事都會發生，一定要正面去處理。」
撰文：張俊銘
攝影：仇志德
化妝：Will Wong
髮型：Hin Wan
場地提供：The Mira Hotel