早排班網民玩長輩圖反送中玩到出神入化，「感化」唔少藍絲加入支持成立獨立調查委員會查警察。八方發現原來唔少中年人、長者對長輩圖係完全冇抵抗力，只要係長輩圖就一定睇，有連登仔喺網上分享好多長者、阿叔俾黃絲長輩圖吸引嘅相，估唔到網民再發揮創意，搞個扮係藍絲版嘅連儂牆「陳百牆」出嚟，上面貼晒長輩圖，其實內容係曲線反送中反警，點知連「收工男」傅振中中伏，仲喺facebook分享！
林子祥阮兆祥躺着中槍
陳百祥堪稱「深藍」藝人，撐送中同撐警形象深入民心，有巿民整咗幅貼滿隱含反送中訊息長輩圖嘅陳百牆，成功吸引一批上咗年紀嘅巿民駐足觀看，再喺WhatsApp群組之間瘋傳，連出名立場極左嘅「收工男」傅振中，都中伏喺facebook分享話：「我哋有陳百牆，阮兆牆，林子牆同黎耀牆，陰氣冇咁重，一定好過佢嗰連儂牆，鬼佬嘢冇好！」
有收工男分享，唔少藍絲朋友都「讚好」，有人讚呢幅陳百牆「正」，有人話「要全港都有」，更有人讚呢幅牆係「以其人之道還以其人之身」，大讚「叻哥好嘢，支持你」似乎藍絲睇嘢，冇睇內容噃，過去鬧出過唔少笑話嘅工聯會立法會議員「醬爆」陸頌雄，可能瀨嘢經驗豐富，今次就心水清，叫一眾藍絲網友「大家睇真啲，全部都是反對派反送中的內容，唔好中計」，先令部份藍絲網友如夢初醒。
對於醬爆呢個溫馨提示，傅振中唔知係咪想死撐，回覆話：「大家記住一點，我寧願市民思想混亂，都不可以被黃屍洗腦！」