「反送中」遊行示威遍地開花，有網民不滿無綫新聞報道偏頗，建議發起「反紅媒」運動後，有位處「紅區」嘅荃灣地產舖，近日就因為不滿無綫新聞報道示威遊行衝突時，一面倒偏幫警方，喺店外貼上「終止播放CCTVB」告示，以停播無綫表明立場。
八方問過呢間地產舖負責人李先生，佢話開業至今一直用開40幾吋大電視，向舖頭外嘅街坊播放無綫節目同新聞，但最近不滿無綫新聞明顯只偏幫警方，「如果咁樣日日播，啲街坊睇到，咁咪即係我都有份宣揚開去？」所以決定停播。舖頭位處荃灣「紅區」嘅李先生話貼出呢個告示後，附近舖頭都有人問佢部電視係咪壞咗？佢就向對方講明上述原因，表明「以後都唔會播無綫」。咁唔播無綫，佢會播乜呢？畀咗3蚊撐《蘋果》嘅佢話，由於《蘋果》無電視台，裝有線新聞又怕好難cut到，所以現時惟有播Now新聞。
佢強調舖頭貼出呢個告示，並唔係想挑釁任何人，只係想講出每個香港人都有權表態，「希望大家都知道有小店都支持香港人，唔好畀啲藍絲以為個個﹙香港人﹚都唔理」。