全球環保意識增強，環保議題成為大趨勢，可持續時尚也漸漸在時裝界受到重視，不少國際品牌先後宣佈停用皮草，推出環保系列，甚至計劃實現無塑料包裝等 。《add》一連四天會看看時裝界如何實踐可持續時尚，展示環保也可以很時尚的一面。今天先訪問本地品牌ATT的設計師Lennon和其拍檔Kin，如何將意指「升級再造」的Upcycling，即是將一些廢棄的物料，經設計轉化成有價值的物品，在要求快和新的時裝界殺出一條新血路。
撰文：高綽盈
攝影：郭賢興
在香港做設計難，做upcycling的設計更難，ATT主要用古着及二手衣為材料設計，當年Lennon正打算放棄做設計，機緣巧合下認識做髮型師的Kin，「因為Kin比較貪靚，所以識咗我之後，就搵我幫佢做衫，我會將佢啲舊衫拎嚟改，都會搵唔同布料幫佢拼砌，然後佢啲同事睇到都好鍾意，發現原來咁樣做有一個市場，咁就開始一齊工作。」看似互不相干的兩人，相遇後擦出了不一樣的火花，ATT正式誕生。
發掘美麗
Lennon表示有很多人誤以為他們是幫人改衫，但其實他們是幫人將舊衣改造，是個reform的過程。「我不會說自己是環保先鋒，但無論係vintage或second hand，都有好多美麗一面，只因曾被穿過，或者已放置咗一段時間，覺得佢冇用，但只要我識得去睇佢有乜獨特地方，將兩、三件衫拼埋一齊，佢哋可能係件好有趣嘅事。」有時候能欣賞到別人看不到的美麗之處，也是一種才能，做upcycling，材料尤其重要，「我們會去vintage店或者網上搵，我同Kin都會去搵材料。𠵱家嘅風格好多時候都會用古董繡花、掛畫或枕頭袋等，佢就主要負責搵呢啲，然後我都會搵vintage衫，另外有時有啲朋友唔要嘅衫，都會畀我哋。」
ATT合作過的明星多不勝數，Lennon笑言他們的設計比較誇張，剛好可以成為舞台服，曾經幫麥浚龍和謝安琪用七件舊冷衫織成一件兩份着，又為盧巧音和孫耀威設計演唱會服裝，Lennon表示最難忘是2016年張敬軒在《十大中文金曲》頒獎音樂會上設計的造型，「嗰個造型用咗七件西裝外套貼埋一齊，全部都留低膊頭同手袖部份，從背部一直加上去，就好似樓梯一樣，我會覺得你上呢個舞台，背後其實有好多人幫緊你，要記得呢一點。」時裝從來不單是一件衣服，創作背後的意義更為重要，也許賺不了大錢，但看見別人着上自己的設計，即使現在回想起，一股滿足感依然湧上心頭。
衣櫃搵料
Lennon說：「我哋係知足嘅人，若果能維持生計，生意都可以繼續做落去，我覺得已經好難得，因為始終我同拍檔係逐件衫製作，係唔會做到量，所以如果你話要從中賺更多錢，係有難度。」在現今世道講心不講金，實屬難得。
Upcycling說來容易做就難，不過只要踏出第一步，你會發覺其實比只齋諗來得簡單，Lennon說：「我覺得要試，噚日我去搵材料，二手店姨姨話前幾日有兩個年輕人買咗兩件西裝外套，第二次佢哋再嚟光顧時，佢哋將兩件西裝外套剪開一半再拼貼一齊，然後一齊着出嚟，我覺得係件好有趣嘅事，能夠搵到個朋友一齊去嘗試，我覺得係第一步。」Lennon建議若想嘗試舊衣重塑，最簡單的方法是從衣櫃中找材料，「可能佢哋有好多唔再着嘅衣服放置咗一段時間，咁不如變成材料，自己做創作，尤其係鍾意做設計，但唔清楚自己有冇呢個能力嘅時候，呢啲舊衫就係材料，好好運用嘅話，其實係個發展自己思維嘅方法。」
【十分鐘做兩件新衫】
Lennon即場示範簡單的十分鐘upcycling法。
他選擇了一件T-Shirt和一件牛仔恤衫，將兩者剪開再合拼，變成兩件新衣服。
steps
1. 首先將兩件衣服重叠對齊領口，將左邊手袖以肩位至領口的中間點為中心對折，並分別剪下來。
2. 右邊手袖則對齊肩線位，將牛仔恤衫手袖剪短至和T-Shirt的短袖同樣的長度。
3. 將剪下來的部份對準切口位置交換拼湊。
4. 將衣服由外至內反轉並進行裁縫。
【藝人作品】
更多精采時尚內容，盡在 http://add.appledaily.com。