黃澤鋒今年初宣佈跟52歲太太陳麗麗造人成功，「鋒嫂」陳麗麗甘冒超高齡產婦之險，上周一剖腹誕下囡囡「小黃妃」，兩夫妻昨日凌晨於facebook報喜，貼出捉着囡囡腳仔的照片後留言：「歡迎你的來臨，生死一瞬間。」
有機會中風
鋒嫂因為出現妊娠濕疹，陀女時吃盡苦頭，必須戒口，上周一入院卸貨，但生產過程出現狀況，幸有驚無險。黃澤鋒昨接受《蘋果》電話訪問時說：「小黃妃上周一出世，媽咪周六先出院，託賴有驚無險，兩個都平安。初初我陪太太入產房，想睇住小朋友出世。太太最初半身麻醉，但腳腫藥到唔到，變咗要全身麻醉，醫生突然請我出手術室，我當時好驚，唔知點講同點做，嗰半個鐘頭好難過。」
黃澤鋒說：「之後姑娘請我入去，話小朋友出咗世，你入去剪臍帶，我即刻衝入去，姑娘叫我唔好望左面，因為急救緊太太，右面係小朋友，醫生話囡囡唔係好喊，我就鬧囡囡『喂，你做乜？』結果佢喊，一喊就冇乜事。我回頭睇太太，佢縫緊針。醫生之後解釋太太生時血壓唔降，有機會中風，做手術升得好緊要，臨界點去到妊娠毒血爆發，產婦有機會中風，唯一可以救係小朋友出世，媽咪就冇事。我見太太唔醒，搖醒佢，母女產後都入咗ICU，周六就一齊出院。」
多頭髮可愛
母女入住ICU，費用超出黃澤鋒預算，他說：「最緊要佢哋冇事，錢使咗可以搵得番。」問到囡囡情況？他說：「小朋友出世有6磅重，似我好多頭髮、好可愛。」他很感謝太太「搵命博」為他生女，承諾會痛錫妻女：「太太搵咗表妹嚟陪月，我叫佢好好休息。」
採訪：比華利