近日喺香港見唔少和平遊行演變成警察暴力打示威人士嘅事件，同我哋好近嘅中國內地，就喺球場內有「真暴徒」出現。我哋偉大嘅中超，上星期六就有一幕「穿心腿」嚇親大家，效力江蘇蘇寧嘅中國籍男子葉重秋，好似前荷蘭「殺人王」尼祖迪莊上身咁，一腳踩落上海上港球員楊世元個心口度，紅牌出場之餘，又再一次印證國內聯賽幾咁暴力。
躁底葉重秋出穿心腿
葉重秋咁躁可能都有啲原因，事關蘇寧賽前已經三場冇贏過，坐陣主場迎戰上港喺七分鐘就忍唔住失控，呢位中場喺爭高波嘅時候，突然好似2010年世盃嘅迪莊一腳「穿心腿」踢低沙比阿朗素咁，踩落上港球員楊世元嘅心口，呢位「新迪莊」當然俾球證紅牌趕出場，但「受襲」嘅楊世元都即刻要因傷離場。打多個嘅上港之後輕鬆贏到3:0，蘇寧球員謝鵬飛又行隊友舊路，喺70分鐘從後飛鏟奧斯卡杜斯山度士，再俾球證罰埋出場，喺九人應戰下輸波收場。
賽後，施展穿心腿嘅葉重秋就喺微博道歉，話自己好內疚會繼續反省，但係內地網民當然唔賣賬，有人仲喺微博「祝福」佢早日斷腳，又要求足總罰佢終身停賽。其實葉重秋今季先由中甲嘅上海申鑫加盟蘇寧，佢一直唔係善男信女，今季踢咗三場中超，加埋都係得233分鐘，已經拎咗1張紅牌同2張黃牌，五月仲試過將恒大前鋒郜林撞到重傷，簡直係「中超殺人王」。
24場已派10紅牌
值得一提，啱啱新加盟上港嘅阿拿奧度域今場冇入大軍名單，但係睇到中超原來有個「新迪莊」，唔知會唔會有啲上錯賊船嘅感覺？咁啱英超球隊韋斯咸都喺上星期六朝早嚟到上海，準備再轉到南京參加英超挑戰盃，阿拿奧杜域會唔會趁機同班前隊友聚舊，然後鋪路返英超呢？
近年中超為咗提高國際地位，引入大量外援想提升質素，但有時對本土球員嚟講未必係好事，始終技術上面嘅差異唔易拉近，咪惟有靠犯規囉！今季嘅中超喺頭三輪賽事已經創造咗一個驚天紀錄，就係24場入面出現咗10張紅牌，比起上季足足多出咗五倍，展示出何謂「功夫足球」。