嫁個有錢人可能係唔少女士嘅夢想，𠵱家仲多咗個潮流，就係嫁畀「富一代」，父女戀、甚至爺孫戀都接受，皆因佢哋睇通「富二代」仲要靠返屋企問阿爸阿媽攞錢，好似公仔箱嘅「大眼」，佢媽咪就悉心栽培，大學畢業就去選美，志不在要做高材生，而係令自己「履歷」多少少睇頭，聽聞當時佢喺大學都有唔少散拖拍。
選完美之後就目標清晰，加上好多場合可以識唔少有錢人，大眼就有機會畀佢搵到「闊佬」。其實，闊佬之前已經有一個又係選美嘅女友，已經拍咗幾年拖，本來大眼係同佢並存，後尾佢阿媽就獻計，叫大眼話自己有咗BB，咁闊佬就揀咗佢，到註晒冊後又話唔小心冇咗BB，不過都嫁咗入豪門，仲有樓揸手，同埋闊佬又覺得佢「小產」好慘，加上大眼仲後生，再有BB絕對唔難。
大眼做咗闊太之後，成日去ball場外，更頻頻環遊世界，但同時亦性情大變，以前小鳥伊人性格冇晒，仲成日出去啲上流社交活動識人，最後佢同闊佬好快就分手，分手後佢亦好快搵到新男友。闊佬傷心咗一陣亦好快識咗新女友，重點又係後生女，一對閃分夫妻幾快就各自展開感情新一頁。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。