江湖傳聞，有朋友說他的兒子讀的小學，大半班講普通話，阿仔因普通話說不好被排斥。曾到小學教ukulele的波波姐姐說：「係真嘅，有半班都講普通話。」「兒歌天后」松松姐姐（陳松齡）近年都說過：「而家直情冇兒歌。」就是這樣，波波姐姐覺得廣東話兒歌應該要傳承。
波波姐姐：「香港而家變化好大，好多嘢隨時無聲無息消失。」我相信包括自由，不過今次主題講地道物事，例如「捉伊人」等兒時玩意，「希望而家嘅小朋友都感受到我哋童年嘅快樂。」
首先釐清一點，波波姐姐：「我覺得我細個聽嘅《小太陽》、《讓我閃耀》，或者今次我創作嘅歌曲，係比較貼近童謠一類，兒歌就包含改編嘅卡通主題曲嗰啲。」同意，童謠歌詞應該比較有含意，即不只是《寵物小精靈》的「活在球內盡是生命」、《自動勝利Let's Fight》的「遇怪魔我即刻變大個」，可能更有教育意義，例如主題會講做人要有禮貌、吃飯要多吃蔬菜、求學不是求分數等等。
幾歲人仔 聽五月天Lady Gaga
波波姐姐正職是媒體創作人，有製作動畫、剪片等經驗，曾在網上唱作流行曲，近一年為籌備《香港兒歌 天晴童謠兒歌繪本Vol.1》而創作童謠，「我有時帶兩個姪仔返學，知道原來佢哋學校最多唱嘅係英文、普通話兒歌，之後發現原來好多朋友嘅仔女都冇聽過廣東話兒歌、童謠，最多都係聽《Baby Shark》，我覺得小朋友童年冇自己嘅母語兒歌，係好可惜嘅事。」
之後，她開始上網搜尋，YouTube只有路家敏年代的童謠。「繪本會有12首歌，開頭諗住翻唱舊歌，但問過版權費唔平，而且有啲版權都搵唔到持有人，所以就有朋友提議我自己寫，咁我又可以加入一啲而家呢個年代嘅嘢入去，都覺得幾好。當然都有我哋嘅童年回憶，好似一首《去公園玩》入面，就提到『捉伊人』、『埋周』，我諗大家都識，但下一代長大後可能只係知『捉迷藏』，會好沒趣，另外我好擔心有啲嘢未來會完全消失，好似點心車、叮叮，呢啲地道元素我都有加入去。」
說到廣東話歌曲，其實不只兒歌、童謠漸漸消失，流行曲都好危險。有份錄音及獨唱的兩姊妹，9歲悠悠及5歲徭徭，都沒有聽廣東歌。悠悠說：「淨係聽過爸爸成日喺屋企聽同唱五月天，廣東歌……都係聽波波姐姐唱嗰啲。」還有聽甚麼歌呀？「Lady Gaga。」
這是波波姐姐的初心，「而家好多小朋友嘅童年，都係得補習考試搵學校，童年應該係好開心，出去玩，去探索世界，我想將呢啲開心事寫入歌裏面。」12首歌，當中有兩首翻唱，包括韋然的《十二隻恐龍去野餐》及《何家小雞何家猜》，「呢兩首版權比較易搞，因為韋然老師係我朋友。」其餘10首原創歌曲，九成都是她包辦曲詞創作。至於小朋友歌手，「之前問好多朋友有冇合適小朋友，其中一位朋友即係呢本繪本負責畫畫嗰位，佢教畫畫嘅學生中有悠悠同徭徭，聽過佢哋send畀我嘅歌之後，覺得佢哋唱得好好，就搵咗佢哋幫手。」
悠悠平常要學中文，興趣班有手鈴、大提琴、畫畫、溜冰，她說：「我最鍾意《我不是成績表》，因為呢首歌話畀爸爸媽媽聽，我哋唔係只要成績好，我仲有好多唔同天份可以發揮。」即成績差也不怕？「係。」那你成績好不好？悠悠擰頭，哈！其實讀名校的悠悠只是謙虛；妹妹徭徭呢？「最鍾意《做個太空人》！」沒解釋原因。 「比起寫流行曲，我覺得創作兒歌、童謠仲難啲，因為歌詞比較難寫，要喺短短嘅歌入面講出想表達嘅意義，但又唔可以一味說教、嘮叨。反而喺旋律方面就好啲，冇流行曲咁多計算、扭音，要比較簡單直接，容易入腦。」
身為兩個小朋友的姑姐，波波姐姐的兒歌題材都來自日常，「好似佢哋唔鍾意食菜，但因為咁去廁所有時會辛苦啲，所以我就寫咗隻《蘋果超人大戰秘秘怪獸》，講蔬果食咗入肚，就好似變身超人咁喺身體入面打怪獸。」「秘秘」應該是「便秘」的BB話。
唱畀家長聽 別只睇成績好壞
「都有啲歌係畀大啲嘅小朋友聽，話畀佢哋知除咗追求成績外，都可以找尋夢想，仲有啲歌係畀家長一齊聽，好似《我不是成績表》，想同家長講，唔好淨係睇小朋友嘅成績好壞。」最後還有一隻bonus track叫《黑眼睛》，寫這首歌的是波波姐姐的朋友Issac，「其實係Issac寫畀個仔3歲生日嘅禮物，講而家香港時勢比較差，但家長都會想畀一個好嘅童年佢哋。靈感係嚟自顧城嘅一首短詩《一代人》，希望佢第時大個聽得明嘅時候，明白多少少自己生於一個點樣嘅年代，喺呢個年代做家長，係唔容易嘅。」波波姐姐未結婚，問到未來會否想要小朋友，她說：「應該唔生，起碼見到香港有個好啲嘅未來畀小朋友，先會考慮。」
這個年代，慶幸還有懂事的年輕一代，希望再下一代能得到快樂，也希望他們能在有廣東歌的世界中長大。當然，亦慶幸在他們的回憶中，沒有譚詠麟的叮噹百寶袋和鍾鎮濤的九唔搭八。
facebook：天晴童謠Sunshine Nursery Rhyme
採訪：陳孝義
攝影：鄧鴻欣
部份圖片由天晴童謠（Sunshine Nursery Rhyme）提供