一班老友嘅定期飯局不經不覺又輪到左丁山做東，地產F係食家，近幾年見到佢一啲相交甚篤嘅老朋友陸續歸天，離他而去（其中一位係郭炳湘），甚有感觸，成日話：「食飯食得幾多錢吖，趁還行得走得食得，食多啲無妨。」當然佢講嘅食多啲，並非到茶餐廳買幾個雞尾包，而是要色香味俱全，令佢好舒服嘅靚嘢，例如上次佢做東，就請我哋去Rosewood彤福軒。照計以佢之能力，一定大把好嘢食㗎？誰知不然，地產F講：「要睇廚師，今時今日，啲著名廚師經常跳槽，例如一間新酒店嘅順德菜，幾個月前好好食，今個月再去，已經走晒樣，原來廚師換咗人！」左丁山知道大家心意，問佢哋肯唔肯過海到九龍，回應係去尖沙咀OK，去遠啲就咪攪咯。於是心念一動，約佢哋去地產F老友郭炳湘生前贒到實嘅尖東帝苑酒店，地產F話：「水哥請過我去東來順，好正。」但打聽之下，粵菜廳帝苑軒在近期推出南番順菜，中菜行政總廚何偉成係順德人，內地電視台講順德菜，要搵何師傅介紹，而帝苑軒南番順菜會做到今年中秋節，既然輪到左丁山揸主意，一於食咗順德菜先。
此日去尖東帝苑酒店，個個坐地鐵到尖沙咀，行路過嚟，人人早到，只有地產F一出門就由司機揸車過海，從銅鑼灣至尖東，行咗45分鐘，遲晒到。其實中午時份到尖東，揸車過海並非最佳選擇。董事H話三十年前經常到尖東「入城」（入中國城也），或者到「大富豪」，跟住嚟帝苑食晚飯飲酒，當年尖東甚為興旺。此日佢提早到尖東行一轉懷舊，發覺街頭甚為冷落，人氣少，舖頭清靜，同三十年前相比，相差甚遠。尖東可能風水不佳，尖西旺到不得了，尖東就得個捱字，若非有幾間靚酒店引來遊客，相信環境仲曳。
帝苑算係企得硬，郭炳湘生前十分重視，特別兼顧餐飲，帝苑內之粵菜、北方菜、日本菜以及意大利菜都在酒店業內有名。中菜行政總廚何偉成在酒店服務多年，經驗豐富到極，此日為我哋炮製香脆金沙涼瓜片、均安煎魚餅兩味小吃，跟住有大良生拆魚蓉魚雲羹。董事H正是大良人，連聲呼好，之後有鳳城腿茸燕窩炒鮮奶、三水煎釀原條鯪魚、古法手撕鹽焗雞、魚湯鮮茄浸美國菠菜苗，單尾係杏壇生炒黃鱔飯。地產F、外匯G等都話日本人視黃鱔飯為男人至寶，食多一碗無妨，只是大家年齒已增，食量不如前，吃一碗仔就算。泰國R話咁正嘅飯，一定要打包，否則好浪費，最後吃到甜品椰蓉花生煎軟糍、桃膠八寶茶，何師傅入房同大家見面，人人向佢拍掌，非常like！何師傅話下次有馬來西亞野生筍殼魚買到嘅話，請大家試吃。地產F立即留低電話畀何師傅，講明一有貨就要通知。