車婉婉最近在劇集《好日子》內，有一個21歲兒子朱敏瀚，現實世界中，今年44歲的車婉婉，自己個仔才不過兩歲多！車婉婉說：「拍嗰陣時我真嗰個仔啱啱先出世，得幾個月，即係咁細嚿，跟住有個咁大粒嘅仔出咗嚟（劇中）！」
如果早結婚生子，車婉婉其實絕對生得出一個21歲仔，偏偏，13年才與拍拖3年的澳籍男友Jonathon結婚，42歲高齡才生下Justus（乳名BBQ）。現在進行式的1+1+1，她說才是完整人生。
高齡產婦的經驗是，「我𠵱家周圍同人講，尤其係啲女演員，當佢哋諗緊雪唔雪卵嘅事候，我話生仔啦結婚啦，鍾意就去生仔啦，因為如果你missed咗，你係冇機會再做㗎喇！」
阿媽係女人，大家都知，首先你都要搵到個老公同你生先得！尤其車婉婉曾被相士批死命中不會結婚生仔，「我都覺得悲涼一啲……所以我自己都冇乜點諗結婚。」
車婉婉終於找到Love，有心唔怕遲，遲到好過冇到！
撰文：文嘉龍
攝影：沈健程
一定要結婚一定要生仔
兩歲多的混血BBQ精靈可愛，網上人氣更加勁，每次車婉婉在社交媒體分享兒子的cute爆相片，BBQ總是搶盡眼球。車婉婉說，做人阿媽愛是全奉獻，「做咗媽媽之後，唔瞓覺又得、唔食嘢又得，我諗我年幾冇買過嘢畀自己。我又驚我老公唔識買BB仔嗰啲餅餅呢，我又要去買一大堆，重心全部都係為咗個家庭、為咗個小朋友先。」
42歲才高齡產子，車婉婉說婦產醫生曾說她好難有BB，建議她採取人工受孕。「我知道我先生好鍾意小朋友，但係我哋一路都冇小朋友，我哋啲朋友就叫我去見吓婦科醫生，睇吓有啲乜嘢問題先！搞完一大輪話你哋咁樣都冇BB，個機率就好低喇，可以試吓人工受精。我好記得嗰時係2016年，佢（醫生）講完一大輪，我記得我好沮喪，諗住算啦，我都係覺得如果我真係需要呢啲方法先再嚟搵你啦，點知睇完佢之後幾個月就有咗BB。」
車婉婉去年尾為幾位牧師的音樂會擔任嘉賓，在台上講及曾被相士斷言嫁唔出的經歷，講到眼濕濕。由以往沉迷玄學又玩塔羅的神婆，變成虔誠基督徒的車婉婉，她說戒煙七日後就識到現在的老公（游泳教練），冥冥中自有安排。
「其實嗰晚係我有一個朋友喺會展有一個event，難得我着得靚靚化晒妝吹晒頭，咁就唔好嘥咗佢，不如出街飲吓嘢，跟住打畀個朋友，我個朋友喺中環開咗間薄餅店，整啲crêpe法國薄餅，佢就叫我出去，就係嗰個朋友介紹我識我老公。嗰晚完全冇抱任何心態，又冇拍緊拖，亦都唔係話搵老公，只係六個女仔一齊去飲香檳嘅一件事，點知就識咗𠵱家嘅老公！」
她說信仰的力量很神奇，「當你有呢個信仰力量嘅時候，你就梗係乜都覺得係神嘅安排啦，就係安排我七日之後識咗我老公囉，exactly！因為我好記得我戒煙嗰日係禮拜三，跟住我第二個禮拜三就係去咗同嗰六個女仔飲嘢，就識咗我老公喇，係好奇怪囉！」
由細到大，車婉婉的母親都對她說，女人最緊要結婚生仔。「我阿媽同我講做一個女人呢，一定要結婚一定要生仔，但係coming from一個婚姻失敗嘅女人，佢同你講一定要結婚同一定要生仔，其實係好冇說服力嘅，但係佢冇理由點我啫，咁我就喺呢個（心理）鬥爭裏面選擇咗搵一個老公先啦當然，咁跟住就有小朋友喇，咁佢（媽媽）真係冇點我囉！」
阿媽返嚟𥄫實我
車婉婉來自單親家庭，她的母親車綺芬的一生也夠傳奇，少女時代由內地來港，偶然機會下到片場探班邂逅了張英才，有說男方為了她拋妻再娶，婚後車綺芬亦有演出粵語片。與張英才的婚姻維持不久，車綺芬其後改嫁美國華僑，生下車婉婉。車母2002年因盜竊及洗黑錢被判監7年，後獲假釋醫病，07年因肝癌病逝。
從小教車婉婉一定要結婚生仔的車媽媽，卻無緣看見愛女出嫁和產子的機會。車婉婉說：「我諗佢在天之靈會好開心。」
凡認識車媽媽的朋友都說，BBQ長得極像婆婆，「𠵱家我個仔個樣都好似我阿媽，尤其是佢笑呢個位，好鬼似呀！我有啲朋友如果識得我媽媽嘅，都會話好似Auntie呀，我就話係呀，佢返嚟𥄫實我呀！我有時會諗如果我阿媽喺度，佢見到呢個BBQ會點呢？跟住我啲阿哥就會話，死梗呀，一定縱壞佢呀！但係冇辦法啦，呢個已經係發生咗嘅嘢（媽媽離世），咁第時我哋會再見啦，下一個回合啦！」
就在訪問前的一個星期，車婉婉和哥哥細佬們，全家出動到寶福山拜祭亡母，她說自從生了BBQ後，已有兩年未去探媽媽了。「上個禮拜我啲哥哥、細佬同佢哋啲女全部喺美國返晒嚟，叫做幾兄弟姊妹reunion，我哋一齊去拜山。我有咗BB幾個月有去拜過山，跟住就冇喇，生咗BB又要坐月又要湊住個仔，個仔咁細又唔去得啦，寶福山有咁多級樓梯上去，我個仔肯定好似冬瓜咁碌返落嚟都似！今次就係全家人返晒嚟，我覺得梗係要去啦，我兩年冇去喇，同我阿媽say Hi！」
有兩兄一弟的車婉婉，與媽媽的感情特別親密，「每個人都有同父母嗰個獨特嘅關係同回憶，佢（媽媽）啲女性嘅嘢只可以同我講。佢對啲仔好嚴，對我都好嚴，但佢真係比較錫我，哥哥細佬都知，佢梗係乜嘢都畀晒家姐㗎！」
07年媽媽離世，對車婉婉的打擊甚大，她更因傷心過度而失聲，「我媽媽過咗身之後，我失咗聲，我唱唔到歌，一個不嬲都係用唱歌嚟表現自己感情嘅一個人，冇咗把聲，好傷心！媽媽過咗身，嗰種憂鬱嗰種抑鬱唔知往那裏走，跟住把聲越抑鬱越唔好，你越抑鬱把聲又越唔好，就係有一個負能量出咗嚟，加埋要做電台，做七個節目Live嘅，咁把聲又點會好呢？我又冇做手術喎，啲醫生同我照晒，話我呢度又爆晒微絲血管，我心諗就係有一種『攬炒』嘅意識，唉，算喇，爛晒佢啦，可能爛晒又有第二種聲好聽呢！」
我同Sammi分享得最多
當年仍是滿天神佛時期的車婉婉，為自己也為媽媽不斷求神問卜，「我以前成日會為咗我嘅人生，我媽媽嘅人生問點解，點解佢要生cancer嘅？Why？點解？搵答案啦，搵算命佬睇吓係咪可以做啲嘢避咗佢，做晒搵晒，全世界最勁嘅都搵晒，咁又點啫？做唔到任何嘢喎，做咗都改變唔到，嗰個係一個好大嘅領悟囉！啲人同我講我好鍾意你同我批命呀，冇人批到你條命呀，其實佢哋（相士）都係人，佢哋唔會知道你條命係點。」
車婉婉說，她清楚記得「把聲返番嚟」那一幕。「我最記得嗰一次突然之間覺得自己把聲好番呢，嗰日就係喺澳門做安仔演唱會，平時我唱一隻《會過去的》都震晒嘅，我把聲爛晒又要唱自己嘅首本名曲，唔走得音㗎嘛，嗰隻歌又難唱，唔衰得㗎嘛，嗰次佢仲叫我唱埋Deanie姐嗰首《教我如何不愛他》，跟住我就喺屋企係咁練練練，嗰次上台個感覺係我把聲返番嚟喇，安仔同個導演都話婉婉你唱得好好喎，你把聲好似好番喎！嗰次之後我就知道可以唱到歌，對把聲有番多啲控制。」
失去母親兼失聲雙重打擊，可幸當時有在華星年代已培養出友誼的Sammi鄭秀文在身邊傾訴，「當時我同Sammi分享得最多呢啲嘢，佢又幫我祈禱啦，又幫我搵咗啲美國嗰邊嘅聲帶中心資料畀我，問我飛唔飛去嗰邊睇，我話冇錢呀，唔得呀，冇去喇！嗰個關口係，啲朋友話唱K，我話唔去喇，我唔想唱歌跟住避咗去，其實係一個幾痛苦嘅關口。」
和Sammi的情誼多年不變，她說：「就算當年我唔唱歌去讀番書，佢都有去LA（洛杉磯）探我，到我返咗嚟我哋都一直有一齊玩，就算唔見面都會有通話，冇乜間斷過。」
最近有冇傾訴吓？「佢好忙喎，搞緊演唱會。我有為佢祈禱，有好多嘢做朋友嘅，甚至係身邊嘅人、做屋企人嘅，你只可以喺個心裏面畀佢力量，個心畀佢力量嘅意思即係，佢要人陪佢嘅時候或者佢想傾訴嘅時候，你會喺度；就算佢唔喺你身邊嘅時候，你為佢而祈禱。人人經歷都唔同，大家畀大家support囉！」
大家心照，會過去的。
【後記】火熱動感La La La
車婉婉是92年第11屆的華星新秀冠軍，她說：「我嗰年新秀入華星係有郭富城啦、又有Sammi啦、又有安仔啦、又有梁漢文啦，嗰陣時啱啱Philip Chan（陳欣健）接手華星，做緊《火熱動感La La La》，我好記得我一入去，覺得華星好生氣勃勃呀！」
華星、新秀、雷射唱片，都是上世紀的回憶。「譬如Sammi嗰隻歌真係好掂喎，《Chotto等等》真係好好喎，我會戥佢好開心，咁梗係羨慕啦，我夠羨慕隔籬寶麗金嗰啲人咯，個個都一個artist一架車，我哋七個artist一架車，華星窮啲吖嘛嗰時，我哋嗰時大合唱八個人呢，我哋係六個artist一架車，人哋隔籬嗰間唱片公司係好有錢嘅，一個artist一架車！我哋嗰時又好開心喎，好多回憶都係逼架車咁樣逼出嚟！」
華星有《火熱動感La La La》、寶麗金就有《熱力節拍Wou Bom Ba》，那個年代那些事那些歌，回憶總是美麗的。
髮型：Katie of Hair Culture中環
化妝：Meegan of Brighten up image production
服裝：Vien
場地提供：CAY PARTYROOM
