黃淑儀是麗的第二期訓練班出身，68年轉投無綫，跟汪明荃和李司棋成為「鎮台三寶」。黃淑儀年輕時是個萬人迷，她自豪地說：「婚前婚後都多人追，有啲有錢到你唔信，佢會問我着乜衫，開架同顏色嘅勞斯萊斯嚟接我。」她18歲在日本讀櫥窗設計時，監護人兒子喜歡她，更聲稱不訂婚就冇得留低，她當然不就範。黃淑儀讀訓練班未畢業已有機會做報時員，但因為派系鬥爭，無辜被炒︰「嗰時公司叫我哋去遊船河，我咪着白色長褲加涼鞋，去到先知上戰艦參觀，汪明荃、禤素霞扮得好靚，第二日返到公司就被前麗的總監鍾啟文召見兼炒魷。」
黃淑儀惟有轉做模特兒，還試過真空行catwalk，她說：「唔係話性唔性感，而係有冇咁嘅需要，嗰件衫係貼到不得了，唔可能着內衣。」未幾，她獲簡而清推薦予鍾景輝，拍全港首部長篇電視劇《夢斷情天》。當年盛傳她與阿姐汪明荃不和，但她否認：「各師各法，有乜好爭？」就算阿姐拍《書劍恩仇錄》劍傷她左眼眉心，她笑笑口說：「冇嬲，基本上佢唔係有心，我仲因為呢件事，無端端攞咗幾日假期去台灣玩。」