昔日花旦、現年71歲的黃淑儀（GiGi姐）自2000年回歸無綫，便成為「大台阿媽」專演母親角色，但她從不計較角色輕重，正如當年她雖然是上位花旦，但甘為了愛情放棄事業。不過作為母親，她心痛細仔徐肇平無故被無綫雪藏，日前她接受《蘋果》專訪不吐不快︰「佢諗唔到呢個圈子咁黑暗。」
採訪：嵐山
攝影：仇志德
黃淑儀做人阿媽超過半個世紀，在劇集內飾演她的仔女不其數，錢嘉樂、馬國明及胡杏兒等全部都是她口中的乖仔乖女。對於由昔日的主角變配角，再做人母親，她淡然地說：「當然接受，唔通叫我做少女咩！」GiGi姐向來不計較角色輕重，在她眼中，演員只是一份工，即使在事業高峯，亦可以為愛拋低一切去嫁人。
列黑名單封殺
對事業不強求的GiGi姐，談到孻仔徐肇平被無綫高壓，卻憤然為兒子發聲︰「當初我真係有啲心痛，肇平喺溫哥華讀演藝畢業，我叫佢返香港見識吓，上我節目後就簽咗畀無綫，一年生一年死約，做咗冇耐就叫佢改簽六年約，佢唔肯。」
最後無綫召喚「慈母」落嘴頭，可惜肇平選擇不加簽，難逃雪藏厄運。GiGi姐說︰「更受傷係我哋一齊演舞台劇，經理人話娛樂新聞節目做訪問，徐肇平唔可以出鏡，因為佢入咗黑名單。個仔出兩本烹飪書，書展上班年輕人嚟恭喜佢，完咗我哋去飲茶，一坐低就收到無綫經理人電話，逐個打嚟鬧：『有冇腦㗎，佢𠵱家俾公司雪藏，你去捧佢場。』鬧到班年輕人喊，我在場睇住，情何以堪呢？仲有人話：『冇聽過，公司冇雪藏佢』，做阿媽係肉赤！」她續說：「之後捱多一年半就完約，佢點會諗到呢個圈子咁黑暗！」肇平近年轉投ViuTV，做幕後製作、司儀及模特兒，人變得踏實。GiGi姐謂﹕「由佢捱，冇所謂。我希望外界讚佢乖，好過演戲好但態度囂張。」
GiGi姐今年1月約滿無綫不再續約，她強調與兒子無關︰「我哋分得好清，只係唔想簽長約。」原本會再拍《吾淑吾食》多倫多篇，可惜拍不成。她解釋︰「我當時啱啱轉經理人，時間錯摸。其實簽部頭最好，唔係我咪俾無綫牽住鼻子走？」適逢ViuTV開拍同類節目，結果一拍即合。
曾歷兩段婚姻
其實，專演慈母的GiGi姐曾歷兩段婚姻，她為前夫劉芳剛和現任丈夫徐景清醫生合共生了四個仔女。家庭與事業，GiGi姐選擇前者，19歲便不理母親反對，嫁比自己年長21年的資深導演兼TVB藝員訓練班導師劉芳剛：「出嚟打工唔通唔可以結婚！劉芳剛又冇不良嗜好，又唔係再婚，兩情相悅，呢個人仲畀到安全感我。」可惜兩人最終因步伐不一致離婚，她說：「當時我去咗外國讀書，兩個小朋友跟佢。父母點唔啱，唔好禍延細路哥。」80年代，GiGi姐認識了同樣離過婚的徐景清醫生，兩人情投意合，再婚後她便隨夫往加拿大生活，仔大女大才復出，她豪氣說：「講真，我唔使做都得。」