【本報訊】7月7日的旺角黑夜，阿權（化名）走在最前線，當他與一眾示威者撤走期間，於山東街遭到警方「包抄」，看到防暴警察向身邊的示威者揮起警棍，為了保護連名字也不知道的戰友，他以手去擋，結果被防暴警察推倒在地，「當時有3個防暴警圍住我」，隨即有人把他拉走，才免於被警察武力制服及拘捕。回想起當晚發生的事，阿權仍然感到憤慨，「我哋連眼罩、頭盔都冇，同埋已經打算撤退，但警察有盾牌、有警棍，包抄我哋唔畀人走，好離譜」。
7.7晚上，阿權和一眾示威者從尖沙嘴沿彌敦道走到旺角亞皆老街，希望能繼續向遊客及途人重申5大訴求，而當時已有大批防暴警察在前方「迎接」他們，「我諗去到亞皆老街嗰邊，同警察最少有30米距離，我哋係無意同警方有任何衝突」。雙方於彌敦道上對峙大約10分鐘後，在示威者經過一番商討，決定離開，「前面嘅警察仲不斷用大聲公呼籲示威者離開」。
保護身邊戰友
正當眾人正向油麻地方向撤退及散去之際，有現場消息指警方在山東街一帶進行封鎖，形成前後包抄、沒有退路的局面，「我跑咗去山東街嗰邊睇，喺周大福度就已經見到有20幾30個防暴警察出嚟封住，變相冇咗後路」。當一眾示威者撤至山東街時，阿權稱已有防暴警察衝向示威者，混亂之間，他看到有示威者被按倒在地被警員制服，也看到有人被打至頭破血流。
在混亂的狀況下，阿權同樣遭到警方的暴力對待，「我見到有防暴警察舉起警棍想打我隔籬個女仔，如果嗰一棍打咗落頭部會造成好嚴重嘅傷害」，為了保護身邊人，在旁的阿權以手去抵擋警棍，「可能呢一下令到佢哋覺得我有意反抗，跟住就有警察將我推咗落地下」。被推倒在地後，立刻便有3名防暴警察將他包圍，「但喺好短時間內我就俾人拉返去後面一個比較安全嘅地方」。
「投訴都冇用」
阿權被警察包圍的那刻，曾一度擔心會被制服，「當時覺得佢哋包圍我之後就會制服我，因為我係唯一一個有伸手出去擋警棍嘅人」。擋棍後，手部有少許紅腫，被推在地下時也令左手擦傷，「同埋右腳都扭親」。混亂時刻中，他感受到身邊示威者的驚恐，「大家都好驚，唔明警察嘅目的到底係乜，明明已經離開緊，估唔到會咁樣被包抄同襲擊」。
回想起那晚的事，阿權仍感到極度憤慨，「如果唔係當晚部署有問題，咁就係特登圍困示威者，令到佢哋驚慌」。那晚的行動，阿權直言示威者幾乎沒有反抗的能力，「個示威係絕對和平，大部份人都係得口罩，連眼罩、頭盔都冇，冇裝備同物資，亦都冇諗住要衝擊」，但警察卻在眾人離開之時進行圍捕，「佢哋係有警棍、盾牌去對付和平示威嘅人，完全冇理到示威者人生安全」。對於被襲，阿權表明不會到投訴警察課及監警會投訴，「因為冇有效嘅制止同監督效力，同埋成功投訴機率好低，唔會考慮」。
■記者李雨夢