2019年6月，是1989年以後最令人難忘的6月，必將在香港歷史流傳數百至一千年。6月發生咁多事，報紙報道篇幅唔少，但有冇人將6月事件編成一本書，方便後來者收藏、閱讀、參考呢？
紀念六四三十周年之前幾個月，60名香港記者奮筆直書，各人寫下1989年6月4日之六四印記，配上大量一手圖片，由大編輯等人編輯成書，在六四晚於維園發售，另外透過二樓書店出售，讀者反應熱烈，據大編輯講，原書已加印兩次，賣出近九千本，留番大約一千本在下星期書展推出，預料賣書數量一萬本以上，大可成為2019年香港暢銷書前幾名。
左丁山問過大編輯：「有冇時間精力出一本香港六月危城之類嘅書呀，將6月9日、6月12日及6月16日，補充埋7月1日大遊行四大事件，配以評論、圖片，背景資料及時序表，應該好受歡迎噃，二百萬人上過街，呢本書賣番一兩萬本容乜易。」大編輯話個人精力有限，但為咗留下歷史紀錄，奮力捱多十幾日通宵工作，都會砌埋佢；應該在七月中書展可推出「六月危城」或「六月圍城」（書名待定，還未定案），起碼對香港歷史紀錄有一份貢獻。左丁山聽到就攞定銀紙，預備買番幾本。
今年六月事件，還有一段議員鬧交故事。泛民區諾軒（中大逸夫書院校友）罵梁美芬（中大聯合校友）冇中大精神，講到新亞之「花果飄零」，梁美芬反駁話「我係聯合嘅，中大就是中國人之大學。」想當年，「香港中文大學」之名稱係一個妥協，記得曾有人提議「華夏大學」、「九龍大學」等等，爭議未能平息，最後錢穆先生主張用「香港中文大學」之名，並非指「用中文的大學」，而係含有「中國文化大學」之意。呢段歷史，左丁山只略知一二，諸君欲知其詳，可以在7月17日星期三上午11點15分至12點45分，到會展中心4樓會議室S428聽演講，題目係「珍重．奮進」──新亞書院與香港，講者有三位，就係香港中文大學哲學系榮休教授唐端正（新亞1953年第二屆畢業生）、黃浩潮（新亞校董，1968年歷史系校友）、何碧琪博士（中大文物館副研究員），由周佳榮教授主持（新亞歷史系73年校友，前浸會大學歷史系教授），以上各位對新亞書院早期歷史皆有研究，唐端正教授師從唐君毅先生，對中華文化花果飄零之說有第一手體會，今年已年近90歲，區諾軒等後輩欲知花果飄零真義，不妨到場一聽。