曾幾何時，六、七十年代的香港是工業重鎮，同時帶旺原材料貿易，當中深水埗大南街屬布匹皮革集中地，屹立上址71年的聯昌皮號，三代人見證香港皮革行業興衰，由當年大貨車塞爆馬路，以至今時今日批發業沒落，相反民間手工藝興起，第三代當家Tommy希望用一塊「不完美」的真皮向年輕一輩解說何謂「raw」（粗獷），「天然皮革有蟲咬有刮痕，但係獨一無二，有生命同靈魂存在喺裏面。」
記者：莫家文
攝影：詹家志
走入聯昌皮號舖內，牆身用近年大熱的灰混礙土工業風，店內燈火通明，毫無老舖破落感，木架、金漆木招牌、紙皮石地磚及支柱等舊物仍然保留，並重新在柱邊掛上舊日的黑白相，極有新舊交融的fusion味，一切都由聯昌第三代傳人Tommy去年初接手後，用三個月重新打造，他笑言：「希望畀到新客一種新感覺，吸引佢哋入嚟。」
雖然顧客沒有增加很多，反招徠港人及外國遊客到此「打卡」一遊，閣樓新設的革新工房，亦成劇團及設計學院借用作工作坊，由師傅級員工向年輕一輩分享皮革應用心得，Tommy用意先將皮革推廣予大眾認識，從而擴闊客戶群，「我發覺好多修讀設計學院的學生，未接觸過呢種物料，皮革係咁多種物料中最昂貴又最有價值，堅實耐磨，我哋希望有機會接觸後生仔，等佢哋明白呢種物料特性，可以應用得更好。」
二戰盛況 千呎長龍取貨
對於從事71年皮革生意的聯昌來說，這種轉變是翻天覆地，卻不得不順勢而行的生存之道。Tommy摸着一匹牛皮料慨嘆：「呢間榮昌係香港最後一家生產皮革工廠，我哋向佢攞貨攞咗四十幾五十年，東主今年賣咗廠房停運，畢竟廠房（巿值）加埋係好多個零，再唔值得做咁小產量，呢批樹膏油製牛皮係香港最後一批，賣晒就無。」
皮革生意曾經在港盛極一時，早於在二戰時被人用作製軍帽、槍套、皮靴及皮帶等用品，需求甚殷，Tommy的祖父母由廣州落難來港，發現皮革生意有可為，1948年便在大南街租舖開店創業，掘到第一桶金，其後買下現址物業經營至今。
當年盛況單從門面兩條紙皮石支柱外圍用鐵架防護可見一斑，Tommy稱：「我哋有個fb專頁，有人問點解出面兩條石柱有鐵架圍住，有人話係支撐個建築物，其實個鐵架無頂住任何嘢，二、三十年前係起嚟擋住五、六噸重貨櫃車，當年車前無感應器，司機上落貨好中意借條柱泊位，成日撞崩，後尾起鐵欄防撞，𠵱家搵架大車都難。」
Tommy指祖父母輩皮革生意興旺，行家取貨便是五千至逾萬呎長。「嗰時皮革係基本原料，（行家）不斷重複購買，成間舖頭叠滿皮革，上落貨好似托米咁上落車……一條深水埗大南街，所有工業商人都嚟呢度買貨，當年呢度無吉舖，大家都想爭入嚟開舖頭做原材料貿易。」唯一擔心是走數。「當年只靠支票或口頭承諾交收，最驚人彈票，買家可能問你攞咗五次貨，第六次就走數，講緊可能係四、五十年前的幾萬蚊，收咗支票後就永遠見唔返。」
合辦展覽 一改經營策略
祖父早逝，祖母張少華頂起梁家半邊天，不但成為當年罕見的女當家，更加是香港皮業商會首位榮譽女會長，威水史一籮籮，誰會想到今日巿況逆轉，聯昌昔日從不做零售生意，隨着批發巿道轉淡，Tommy想辦法轉型，乘亞洲手工匠人熱潮重修舖面迎合零售巿道，地舖主要是成品或皮料，最平20多元有交易，二樓是不同來源地的皮革原料及儲存倉，三樓則是Tommy母親開設的工作室，為熟客訂製皮革製品，他還從外招聘工匠或與手作匠人合作，專屬訂製新品及維修舊物，漁翁撒網包攬各種生意。「以前批發同零售係九比一，𠵱家批發真係一成都冇，港珠澳好多皮革舖都做唔住。」
有危自有機，大南街近年經營環境轉差，空置舖位湧現，現時一間大約700呎的地舖，只需月租2萬多元便可租下，巿價與觀塘工廈相若，吸引不少新生代租店開設文青咖啡室或小型展廳，Tommy不時與他們合辦展覽，務求達致雙贏。
自幼在皮革業上打滾的Tommy，要讓顧客愛上皮革，唯一衝破是客人對靚皮的誤解。「好多女士揀手袋希望塊皮完美無瑕，或以為無花痕、無皮膚質感嘅真皮，就係一塊靚皮，呢個認知同我哋做皮革或外國人理解好唔一樣。」他以一塊充滿斑駁痕迹的西班牙牛皮為例，「外國人中意好raw嘅嘢，我想知道呢隻牛生命歷程，經歷過蟲咬、皮膚病，俾樹枝同圍欄刮到嘅痕迹，或者同公牛打交留下嘅不完美，呢個先係獨一無二嘅產品……如果變咗做一塊熨面漆皮，咁係嘥咗，不如買塊膠皮就算。」言畢他將另外兩塊外國真皮展示予記者，「呢個意大利皮染底面，浸味好香，煙熏山羊皮就似smoked salmon味（煙熏三文魚）。」有麝自然香，對於Tommy來說，牛皮如人脂凝香，早已烙印在心。
港故事
有些人有些事，越是美好越留不住。本土手藝、傳統行業、街頭老店，都帶給我們生活的溫度和記憶的厚度，如果你知道有這樣的故事，歡迎提供。（致電或WhatsApp 6383 6568 註明「港故事」）。