出席午餐會，碰到大班中環人，左丁山頭岳岳，周圍踱之後，畀股壇元老W一手捉住，問：「你嚟做乜？」特登嚟聽嘢，聽吓啲國際級精英有乜好講吖嘛。元老W今年七十八歲，精神到極，若非因年齡關係，要強迫退休，佢仍然可以係中環證券界風雲人物。
問元老W點解股市跌完又跌，是否一如大摩所言，要沽售全球股票，元老W話：「唔識喇，亦唔理，留番畀啲年輕人玩咯。」又係嘅，不過年輕人有不同定義，元老W口中之年輕人，可能係60歲之後輩，並非18歲、廿歲之帶頭示威勇武派，總之交棒係一代交畀一代，極少隔幾代交收嘅。元老W住在愉景灣凡三十年，身體狀況極佳，佢話貪愉景灣清靜，空氣比較好，在屋邨範圍內周圍行，已經夠晒運動量，以前每日坐船返中環，在極嘈吵環境中討生活，到黃昏便覺疲倦，坐船一返到愉景灣，恍似進入另外一個世界，成個人輕鬆晒，頭腦耳朵皆可休息，不似在港島工作與居住咁整日緊張，無時刻可以放鬆也。
畀佢講到心郁郁，幾乎想食完午飯跟佢到愉景灣住宅區行吓，不過埋位食飯之時，剛好坐在一位昔日高官旁邊，講得興起，跟住又有一啲中大師妹師弟見到打招呼，講講吓，醒起還要留在中環幾小時，於是打消愉景灣一遊之「衝動」。舊高官嘆息：「班𡃁仔好收手啦，再搞行街散步，生意一定受影響。」問佢如果仍然在位，如何對付班𡃁仔；舊高官沉思一陣，話：「最好防患於未然，唔好畀事情搞大催生譁變。想當年我做地區事務，上司在中環總部要我地個個月交民情收風報告，我又要屬下聯絡主任交收風報告，一個月起碼有十二三晚與區內不同組織見面吃飯，凡中央有乜新政策推出之前，我地就周圍試探各區反應，保證下情上達到司局長級數。」咁依家官員又點呢？舊高官說：「隔咗咁多年，唔敢講，有時收到八卦料話，上頭對泛民或其他團體反對嘅消息，好少理，只係緊張民建聯/工聯會方面支唔支持！」當然時代已變，靠收風已經out咯，網上消息咁多，要有專人收集分析至得。想落亦係，唔怪得有人眼光獨到，即刻搵埋大數據分析學家成立公司，專門贒實（monitor）網上風吹草動，分析「行街散步」之風險及出現時間，啲政黨以及政府開聲講對此極有興趣，會成為客戶咁講。21世紀收風不再是飲茶食飯攞料，而是電腦科技之精妙運算，近月「連登」發揮極大組織能力，政府反應緩慢，此則不知是官員之錯還是林鄭大鼻了。