由葡超球隊波圖轉投西甲豪門皇家馬德里嘅21歲中堅艾達米列達奧,周三終於喺巴拿比奴球場亮相,但佢喺新聞發佈會度突然頭暈而提前離場。米列達奧喺新聞發佈會度一直都好緊張,當記者問到有關尼馬嘅問題嗰陣,米列達奧突然表示自己頭暈,更加解開恤衫上嘅鈕扣,雖然有工作人員即刻遞水畀佢,但米列達奧飲完水都仲係好唔舒服,最後就表示自己好激動,唔能夠再答任何問題,就咁離開發佈會現場。到底點解聽到尼馬嘅問題就咁緊張呢?真係好耐人尋味。講起尼馬,據英國《天空體育》報道,呢位巴西前鋒早前就冇出席到巴黎聖日耳門(PSG)新球季嘅首課操練,結果球會目前就傾緊係咪會扣起佢份每月獎金作為懲罰。