葉璇現年39歲，有個內地造型師男友小默先生，兩人拍拖四年，感情穩定，但她卻有不婚打算。葉璇認為情侶相愛是公平交易，彼此交易關心，交換愛護，互相欣賞，覺得維繫關係不用靠一紙婚書，「呢一張紙只係保障一啲弱者，等佢哋離婚時可以有保障。」
撰文：比華利
攝影：沈健程
葉璇於2011年開始發展內地巿場，2015年承認戀上內地造型師小默先生，事業和愛情令她樂於留在北京生活。葉璇日前在尖沙嘴接受《蘋果》專訪，出道以來一直給人強勢感覺的她，不認同堅強女人不被男人疼錫，快人快語的葉璇說：「我可以遇到仲強嘅男仔呀，更強嘅男仔咪會保護我。」但拍拖對象，葉璇卻堅決要揀心智不相若的男伴：「太強、太弱一齊拍拖都冇共同語言，兩個人愛情觀、世界觀要差唔多。冇公平基礎係冇愛情可言，溝通唔到。」
離婚好容易
擇偶條件葉璇謂從沒有要挑「富二代」，她說：「我從來唔鍾意富二代，唔知你講『富二代』定義係點，富二代往往畀人感覺自己冇本事，要靠屋企，我只睇佢係咪有能力嘅人，我唔會介意佢係富一代定富二代，最緊要佢本人係咪獨立自主，係咪有知識、有修養同靚仔嚟。」不過，她卻要揀靚仔：「乜有人鍾意醜樣咩，好肥、好瘦都唔健康，瘦到好似馬騮都唔順眼啦，健康陽光咪靚囉！」
葉璇表示愛情是公平交易，「愛情唔係只搵對你好，一定要互相對大家好，冇人可以單方面付出愛情，我覺得愛情係公平交易，交易關心，交換愛護，互相欣賞。」葉璇與男友小默先生相戀四年，感情穩定，兩人之間的相處也是公平交易。她近年被記者問得最多肯定是婚期，她笑言：「問咗好多次，但我唔介意再講多一次，結唔結婚有乜分別？呢一張紙只係保障一啲弱者，等佢哋離婚時可以有保障。如果大家不相伯仲就唔需要嗰張紙去證明啲乜嘢。一段平衡關係，唔係靠一張婚紙，𠵱家離婚好容易。」近年跟小默先生的確少了有影皆雙，她說：「咁多年拍拖，我好少話帶男朋友出嚟，以前叫我去佢啲event宣傳，我會去，大家之間鍾意去就去，從來唔勉強。」
分開唔抱怨
對於男友小默先生，葉璇大讚他是10分滿分男友：「我梗係畀佢滿分，仲認定佢係長期做伴先可以繼續落去，但感情好難講，或者有一日，大家行到去分岔路口，需要分開行吓或平衡行，又或者唔喺同一條線或兩個城巿都有可能。我覺得要隨緣，勉強亦強求唔嚟，相處要舒服、開心，鍾意就要全心全意去鍾意佢，到分開都唔好互相抱怨，大家有共同美好回憶就唔會有遺憾。大家冇欠大家，我又冇使你錢，你冇使我錢，我冇對唔住你，你又冇對唔住我，大家開心就一齊，如果覺得唔開心，大家咪輕輕放手，從來唔會畀對方束縛。」
場地提供：六公館
化妝：Chris Lam
髮型：Ali
服裝提供：Ermanno Scervino
內地獲厚待
有愛情滋潤的葉璇更全心投入發展演藝事業，這幾年北上發展，她在內地擁有自己的製作團隊，回想早年北上拍劇，她說：「20年前，我返去開工，飯盒得雞翼尖同兩條菜，好簡單，但人人都係咁，我都慣。𠵱家拍劇，飯盒有四餸一湯好豐富。內地劇近年發展係快，但其實同香港差唔多，各有千秋。」
葉璇99年代表美國紐約來港參選國際中華小姐奪冠軍入行，受到娘家無綫力捧，她累積了經驗和知名度才往外闖，葉璇坦言在港建立的知名度，讓她在內地開工時換來不錯的待遇，除孭飛當女主角，劇組又會遷就她的開工時間：「女仔瞓得少，拍出嚟唔靚，配角鏡頭前行過，唔會太介意佢有冇黑眼圈或殘啲，全係我喺香港累積咗知名度先有咁嘅優待。」