資深演員李兆基上月2日因肝癌擴散至肺部病逝，終年69歲，李兆基遺孀「基嫂」邱巧貞、摯友陳慎芝前日為李兆基於鑽石山殯儀館設靈，以基督教儀式進行，昨早10時進行大殮。李兆基生前好友黃秋生、羅家英、杜琪峯及徐錦江等前日亦有到靈堂弔唁。陳慎芝稱一班好友為喪禮出錢出力，令他感動，又呼籲年輕人勿吸毒：「好多後遺症。」
勸誡切勿吸毒
昨早進行李兆基的大殮儀式，陳慎芝及顏仟汶早上9時已抵達，基嫂一早到靈堂為亡夫打點身後事，9時半完成儀式後，白色棺木移送出靈堂，基嫂抱着亡夫遺照步上靈車，遺體移到鑽石山火葬場火化，顏汘汶亦到火葬場禮堂送別好友，基嫂步出時心情平復，也有跟親友閒聊幾句。
陳慎芝指喪禮上見到許多有情有義的畫面，導演杜琪峯及劉偉強、黃秋生、徐錦江及羅家英前晚都有到殯儀館送別李兆基。他更大讚秋生有情有義：「秋生有嚟，覺得好感動，因為佢平時份人好有個性，見佢現身都覺得佢有情有義。」李兆基骨灰會安放於鑽石山火葬場骨灰龕位。
李兆基因肝癌擴散至肺部病逝，年輕時曾與李兆基沉淪毒海的陳慎芝，以過來人勸告年輕人勿吸毒︰「因為就算戒毒隔咗多年後，亦會有好多後遺症，好似肝癌及肺癌，我嘅學生都有問我驚唔驚，我話冇得驚，自己戒毒四十幾年，活到71歲已經賺咗，希望今次畀到個訊息年輕人。有一次見到基哥嘅家姐同細佬，大家見面好似陌路人咁，甚至我媽當年見到我都唔會打招呼，自從戒毒後，大家見面開心咗，媽咪知我戒毒拎到獎，開心到周圍同人講。」
難忘提攜之恩
另外，顏汘汶指當年受李兆基提攜，帶她入行拍戲，談到二人相處最深刻的回憶，顏汘汶憶述是李兆基幫她克服舞獅的恐懼：「因為自細好驚人舞獅，基哥知道我驚之後，成日安排我參加花炮會，仲鬧我，要我一定要克服，同我講你做呢行，人哋要剪綵點睛咁點算。」她笑言許多人覺得李兆基又惡又cool，但她反而很尊重他：「喺佢面前唔會玩得太癲，基哥嗰時都睇住好多亞視藝人，有錢齊齊搵，絕對有義氣，後期我哋都有微信聯絡，試過幾次想約佢出嚟食飯，但係基哥有時好硬頸，要覆診都唔會講，基嫂都叫佢同我講聲就得，好在基哥好聽基嫂話，咁就一而再再而三押後，都遺憾見唔到佢，如果基嫂第時有乜需要，我能力範圍內都會幫忙。」
採訪︰馬建華
攝影︰仇志德