香港陷入渾沌狀態，年輕人感絕望。合和實業主席胡應湘上周接受訪問，不欲多談政治，惟對於土地供應問題，他過去20年向歷任特首進諫均不得要領。社會躁動不安，他認為是財富集中於政府及地產商之過。根據法國大革命、俄國十月革命經驗，沒有國家及城市可安然度過貧富懸殊危機，他希望社會能夠同意大型填海、興建公屋，來一次財富轉移，降低生活成本，香港才有希望。
記者：周家誠 陳東陽 李海澄
這位見盡香港潮起潮落、波譎雲詭時代的老人，今年已經83歲，自嘲日後填海成功時恐已「蒙主寵召」，作為第三代香港人，希望下一代能安居樂業，還土地於人民。
胡應湘今年將合和私有化後，首次接受《蘋果》專訪談香港大勢。本報記者一行人上周四到達灣仔合和中心64樓辦公室，途經前執董胡文新房間時，門外名字已經遮上，不過未礙父親與記者談笑風生。
警惕法國大革命重演
胡應湘年少時在美國普林斯頓大學讀土木工程，見盡當時稀世的摩天大廈及渡海大橋，帶給他宏觀視野，正如他閱讀香港問題時也從世界歷史角度看，形容財富傾斜至政府及發展商，屬社會問題主因。1789年法國大革命，1917年俄國十月革命，最終揭竿起義，「太多財富集中喺太少人身上，冇一個地方會好，可能演變成暴動㖭」。
香港這一代正正有這特徵，「以前你揸勞斯萊斯，啲人會覺得有機會我都想買，𠵱家淨係仇視，呢個係共產主義」。胡應湘說：「好多人俾租樓、供樓壓到不得了，資金去咗邊？第一係政府，盈餘五萬美元一個人；第二係地產商，包括阿叔在內，好公道。」
土木工程系出身的胡應湘打開地圖，提出填海改變香港命運。政府推明日大嶼計劃，背後有董建華旗下團結香港基金發功，不過胡應湘野心較政府更大，希望為香港以1,000萬人口規劃增加土地，「等於屋企請食飯，唔知有幾多親戚嚟，我擺定張12人枱就冇事」。
他提到香港人均居住面積173方呎，僅好過孟加拉。胡應湘認為相對香港人均收入較高，250至300方呎才合理，「傢俬都靚啲，電視都大啲」。
作為政府推行明日大嶼背後一位重要推動者，形容東大嶼是「寶藏」，除了是水淺得五米至十米；附近芝麻灣山頭可以供應填料；地理位置鄰近中環、尖沙嘴，可以鐵路連接；海堤只要興建得夠寬，往後填海未必有額外開支；至於白海豚生存危機，他笑說：「如果你放泥落海，白海豚唔識走，嗰條係蠢嘅白海豚，唔見咗你都唔會可惜。」
胡應湘指着窗外，「百幾年前灣仔都係填海，呢度同春園街都係填出嚟，我阿爺、我老竇，又唔見環境唔好？」至於東大嶼起多少公屋，他認為須由政府決定，「土地屬於人民，你唔可以要人民同你買（貴）地！香港人住得咁密，如果唔搞公屋唔掂」，胡應湘斬釘截鐵地說。
「住300呎唔係苛求」
「250呎至300呎居住環境，唔係苛求」。胡應湘以自己跟老婆郭秀萍生活做例子，「（後生仔）佢未舒服過，我住過豪宅超過一萬呎，不知幾安心，畀老婆吟兩下就去第二間房，你叫我住300呎就……」
胡應湘身邊老友不少「金童玉女」想結婚，都嘆上樓不容易，「劏房咁大都要幾百萬，政府有責任解決，我成日提：地價作祟，畀返自己建築費係天公地道，地價就唔係」。香港年輕人須有低成本居住環境，才有機會往上游，「香港好多百億闊佬，有啲以前住徙置區，有屋住，呢啲叫upward mobility」。
不過，香港政府推出送中條例引爆政治風暴後，明日大嶼撥款亦勢將暫緩，而本身這項極具爭議性的政策有可能難以推行，「地冇多到，人多咗，啲嘢只有貴，樓價只會挾上」。胡應湘希望民眾及政府可以合作，「如果收返嚟嘅薪水，大部份畀咗租金，同埋成日顧住買樓，點會有穩定前途？」他又惋惜年輕人認為填海是益發展商及商賈，「我83歲，填得嚟都見到訃聞，蒙主寵召，我係香港第三代，（提填海）係為咗香港人」。