90年代出道的黎明詩，當年憑甜美笑容迷倒少男，被封「青春玉女」歌手，可惜在娛樂圈發展六年就淡出嫁人。前年重踏舞台，今年9月與同期歌手開演唱會，談到當年為愛情放棄事業，她無怨無悔，正如她公開暢談同性戀，一樣坦蕩蕩。
撰文：黃曉妍
攝影：陳慧安
黎明詩日前在尖沙嘴接受專訪，指當年退出是因為不適應娛樂圈的生存模式，加上遇到結婚對象，於是決定進入人生另一階段：「可能我感情用事，遇到個啱自己又到結婚年齡，咁不如結婚，你問我捨唔捨得，我又冇諗，總之下一步就係結婚做人妻。」
不會在乎性向
好景不常，黎明詩的婚姻最終失敗，不過兩年前，她突然宣佈與同性密友Kelly一起：「我冇特登公佈，係當時記者問，我諗同佢都感情穩定，所以講出嚟。」她坦言不在乎性向問題，只因人大了，想找個真正了解、愛錫自己的伴侶：「由細到大都覺得女仔出嚟社會做嘢，然後結婚生仔，我試過但唔work，同前夫性格唔夾，拖拉十幾年，其實結婚五年後，大家已各自生活，我哋冷靜傾過至分開。」
數年前遇上Kelly，人生從此改變，黎明詩說：「以前同妹妹喺英國選過華裔小姐，唐人街好多人都知我哋係邊個，Kelly以前喺英國讀書，從朋友口中知道我哋，到佢畢業，我已返咗香港。多年後朋友介紹認識，好似有啲緣份，大家就成為好朋友。人大咗都唔係為名份、男定女，只要大家相處得好同開心。」
外遊享受人生
黎明詩指前夫知道她出櫃後，起初有點愕然：「佢覺得最重要係我同Kelly開心，父母都係咁諗。」問Kelly為她做過甚麼感動的事？她甜笑說：「好多，佢對我、朋友都好關心，心照，有時感動位未必講到出嚟。」問到性取向轉變有否內心掙扎？她說：「我喺英國讀書，好開通，加上我有好多同性戀朋友，所以我對呢樣嘢唔抗拒，只不過我冇諗過會同同性一齊。」對於台灣早前通過同性婚姻合法化，她說：「未諗呀，做住伴先，我哋幾穩定，唔刻意結婚，最重要開心。」
兩年前，黎明詩現身公開活動，問是為復出鋪路？她說：「其實冇特別想復出，咁啱朋友搞唱歌比賽，我幫手做評判，其實亮相《流行經典50年》前，已經有人搵我，但我冇信心，又肥又冇練歌，驚狀態唔好。」她已計劃好外遊享受人生，工作是「啱先做」，9月她將與黃翊、林利、何婉盈、黃寶欣等在伊館舉行兩場演唱會，黎明詩說：「成班人一齊開心啲、熱鬧啲。」
場地提供：The AIR（The ONE）
【六年短暫婚姻】
黎明詩的父親是粵劇老倌黎家寶，她中二赴英讀書，曾與妹妹於英國選華裔小姐奪得冠、亞軍。87年參加新秀及亞洲太平洋歌唱大賽都落空，之後正式入娛樂圈，拍過《霸王花》等電影。91年闖樂壇獲力捧，同年獲十大中文金曲最有前途新人獎銅獎及十大勁歌金曲最受歡迎新人獎銅獎，成名作有《敢恨敢愛》及《Goodbye My Love》。
94年黎明詩退出樂壇，四年後和銀行家Eric Fung結婚，可惜婚姻維持僅六年。04年與老公分居後，16年與同性密友Kelly同居，Kelly曾留學英國，是她的忠實有米fans。