【馬鞍山→荃灣】今屆香港小姐競選前日安排15位入圍佳麗轉look後，便返咗電視城接受訓練，日內將會首度正式會晤傳媒。入圍嘅馮盈盈師姐楊慧敏之前大方承認有男友，而且好支持佢參加比賽，前晚大約10點，楊慧敏同另一個佳麗齊齊離開電視城，之後上咗一架寶馬座駕，之不過個「男司機」嘅警覺性好高，佢先測試有冇車跟住，沿途一直高速行駛，去到油塘附近放低同行嘅佳麗，跟住就駛去馬鞍山。
搵食卻閂晒門
停車後記者上前訪問，楊慧敏個樣似乎有啲緊張，全程機不離手喺度講電話，似係想迴避採訪。男友人向記者透露佢哋本來諗住去搵嘢食，點知太夜，好多舖頭都閂門。問到佢哋係乜嘢關係，男友人就指一指楊慧敏，叫大家問番女方，仲笑笑口合十向記者表示謝意，最後開車到楊慧敏喺荃灣嘅屋邨住所，不過楊慧敏都冇講呢個係咪男友，講咗句「Thank you」就返咗屋企。
用腳撩男同學
另外，噚日本報接獲報料，有讀者表示同楊慧敏係中學同學，嗰陣佢已經係「獨家村」：「佢試過上堂用腳撩隔籬位男同學隻腳，加上有次班會活動去BBQ，主動話玩遊戲輸咗會除衫，之後佢喺大學讀完營養學冇幾耐，做空姐一年都唔夠，因為太過公主而被排斥，做得唔開心，又走咗去做傳銷。」讀者仲提供當年楊慧敏私影嘅報名link，仲話：「佢讀嗰陣已經好熱愛私影，不過佢已經delete晒所有相，unfriend大部份嘅中學同學。」
採訪、攝影：梁繼光、徐錦池