特首林鄭月娥至今仍然口硬，唔肯講明撤回修訂《逃犯條例》草案，反而自從7.1衝擊立法會大樓後變得相當「陽光」嘅立法會咪兜，日前由添美道「撤回」大樓公眾入口2後，唔使再日曬雨淋，不過呢個新咪兜可能過埋今日（10日）就「壽終正寢」，因為立法會秘書處傍晚出通告畀議員，星期四（11日）朝早8點開始解除紅色警示，到時議員、議助、秘書處職員同埋記者，都可以返入大樓開工！
傳媒最受惠
7.1之後因為立會大樓被佔領而封閉，立會咪兜就移師咗去添美道行人路上，而呢個臨時咪兜亦成為各政黨嘅兵家必爭之地，建制派何君堯仲試過排唔到咪兜，即場發爛渣鬧人，但八方噚日見到咪兜已經撤返入大樓公眾入口2外面嘅半戶外地方，即係四年前冧簷篷嗰個位。咪兜撤退咗，最大受惠者當然係傳媒，唔使再餐風飲露。不過，咪兜返咗大樓範圍，就變成得議員先可以用，所以大樓外個咪兜應該仲有其他民間團體用。
八方聽聞，工黨張超雄有份幫口，叫秘書處撤回咪兜返入去。有秘書處職員就話，張超雄確實有反映過，但其實秘書長陳維安早就諗過喎。八方就覺得，𠵱家天時暑熱、大樓外蚊蟲又多，徹底撤回咪兜返大樓入面就最好啦！
雖然大樓好似開番，但係有關公眾嘅服務，例如導賞團、圖書館、檔案館、兒童學習室，仲有醫肚嘅立法會餐廳，仲繼續關閉。
李八方