雖然話因為美國非農就業數據好，令減息預期沖淡晒，但話唔關之前中美重啟談判、3,000億美金中國進口貨暫緩關稅事？至少小弟陰謀論咁睇，就覺得兩者必有關連。話晒掌控FOMC呢個影響全球金融市場嘅委員會人數，只得區區十丁友，你就想像到政治操控聯儲局決定有幾咁唔出奇。呢個決定，原來可以令港股一連兩日顯著下跌。
當領展（823）可以升到3厘息唔夠，增長潛力若隱若現嘅百威（1876）都可以預計30倍樓上PE上市，就知道資金幾咁氾濫，掉返轉，寬鬆少啲啲，對大市就有大影響。
呢幾年人民幣債務好似美債一樣，還息唔還本金咁永續生存落去，美國甚至呢一刻仲想壓低債息，雖然睇圖就知未來大幅壓低債息有幾困難，但歐洲似乎想加入戰團，拉加德出任歐央行行長嘅話，睇怕陪美國齊齊減息。
喺呢兩日調整市，就睇到乜嘢股惜售，乜嘢股一跌就有錢仆落去。超寬鬆加上經濟前景不明朗下，資金多但選擇少，高息股、消費股、未來概念股繼續升繼續歸邊，睇嚟會似2013、14年科網濠賭熱潮咁玩法。所以波司登（3998）被狙擊都照破頂，睇怕渾水想隊冧安踏（2020）都難了。
晉佳
http://fb.com/advanceguy1
本欄逢周一、三、五刊出