曼聯喺星期一抵達澳洲嘅珀斯，開始佢哋季前熱身賽之旅，星期六就會踢第一場波喇。盛傳會離隊嘅球星保羅普巴同盧卡古，雖然有隨隊出征，但普巴唔知係咪有心事，喺澳洲第一日就同好兄弟連格鬧交，要域陀連迪路夫做和事老，而且仲被紅魔官方拍咗片、剪埋出嚟擺上網，真係莫名其妙！
曼聯喺星期一上載咗條片，內容係一班紅魔球員經過16個鐘頭航程後，喺珀斯街頭散步，但條片中間竟然有個位，見到普巴擰轉頭同連格講嘢，連格邊聽邊伸晒手咁，表情同動作都睇得出佢有啲嬲，而普巴就黑晒面擰番個頭去前面，相當冇癮咁。跟喺兩者身後嘅連迪路夫就識做喇，即刻拉住普巴同搭晒膊頭，希望普巴唔好咁躁冷靜番，雖然普巴冇再出聲，但個樣仲係有啲不滿。呢個部份其實只係得三秒，不過網民就話唔明官方點解會咁樣剪出嚟擺上網，仲話係咪想暗示將會賣走普巴喎。
國際想撬馬迪過檔
到目前為止，曼聯已經買咗小將丹尼爾占士同雲比沙卡兩位新兵，但有人嚟就自然會有人走。喺條片入面唔止普巴同盧卡古有機會喺今夏離隊，仲有另一位有隨隊出征但可能離隊嘅魔將，佢就係30歲嘅塞爾維亞中場尼曼查馬迪。有傳馬迪知道米蘭雙雄有意買佢後，已經同領隊蘇斯克查傾緊未來，至於蘇B就希望球隊年輕化，所以都已經搵緊馬迪嘅接班人。意甲嘅國際米蘭就諗住用比利時中場尼恩高蘭再加1,000萬鎊（約9,700萬港元）交換馬迪，等新帥干地可以再同馬迪合作。
靴里拉嫌紅魔太慢
至於另一位以自由身轉投巴黎聖日耳門（PSG）嘅西班牙中場安達靴里拉，轉會後人工三級跳，但佢話自己唔係因為貪錢而離隊，仲話本身肯留喺曼聯，無奈紅魔動作太慢，開張新約畀佢嗰陣佢已經應承咗PSG，靴里拉仲話自己想喺一隊視佢為核心嘅球隊度踢波。雖然靴里拉最後冇留隊，但都好多謝球會、球迷同蘇B，話自己喺曼聯嘅五年日子都好開心。