莘莘學子苦讀多年迎來DSE放榜，心情想必緊張，「女車神」李慧詩則寄語各考生無論成績好壞也不用太緊張，一定要為未來做好各樣準備。
公開試乃絕大多數港人必經之路，一眾單車港將也曾經歷這關口，李慧詩建議考生們放榜時記緊冷靜︰「各位考完DSE嘅朋友，今個暑假做啲咩？記住睇吓自己有咩planning，收到成績唔需要太緊張、太灰心，亦都唔需要太興奮，跟住你個plan去做啦。」
應屆亞運麥迪遜賽冠軍「孖寶」梁峻榮與張敬樂則表示公開試絕非人生的唯一，年輕人最重要了解自己興趣。梁峻榮為DSE首屆考生，他希望同學以平常心迎接放榜︰「千祈唔好畀自己太大壓力，記住呢個唔係你人生嘅唯一。我以前係第一屆DSE考生，同學成績有好有唔好，大家有唔同出路，反而考得唔好嘅同學會諗多啲自己有咩想做，成績唔代表一切，最緊要做自己想做咩。」張敬樂亦表示不可單以學業論成敗︰「我算係揀咗單車運動做職業，一路練車都有少少溫書準備會考，點都想合格，最後亦如願，之後去踩單車更專心。唔一定讀書叻先有用，行行出狀元，好多行業唔一定係讀書讀得好先做得好。」
記者：洪量丰、徐嘉華