前日九龍區個大遊行，有差人同示威者發生衝突期間，向示威者爆粗呼喝市民係咪想隻揪。條片畀網民放上網即熱爆，噚日網上又流出一封隻揪戰書，而且句句寸到隻揪差人應一應。
呢封署名「市民王先生」 嘅信，開宗明義話係「有關警員PC21304向公眾發出一對一搏鬥邀請（隻揪）事宜」，成封信句句有骨，好似話佢唔知警例係咪容許差人執勤期間，向市民發出隻揪邀請，「但從PC21304友善的眼神、整齊的衣着，充份感受到他對『隻揪』 的滿腔熱誠，就是俗稱的『感受到他心中的一團火』」，呢句擺明抄星爺「少林足球」對白，之後仲拉到政府鼓勵市民每日運動30分鐘行動，話既然警員咁熱心推廣運動，盛情難卻下，仲可以隻揪化解社會戾氣，叫警方搵地方安排隻揪。
八方見越來越多人想同PC21304隻揪，不如警方搞個「天下第一武道大會」，等PC21304甚至對班示威者執行法紀嘅警員同市民隻揪，咁既可公平比試，又唔使次次喺街度俾差人打。