巴塞隆拿今季兩大收購目標齊齊「罷工」？繼星期日西甲馬德里體育會發聲明話，陣中球星基沙文（小圖）開操唔見人後，法甲巴黎聖日耳門（PSG）星期一亦發表聲明，話原定喺同日歸隊開操、準備季前熱身賽嘅尼馬竟然甩底，仲話會採取適當行動。
尼馬本來入選咗巴西國家隊出戰今夏美洲盃，但喺開賽前受傷退隊，喺星期日嘅美洲盃決賽，尼馬都有現身看台撐巴西，事後仲喺社交網站度祝賀國家隊隊友捧盃，唔知尼馬今次失蹤，到底係因睇波未趕得切返歸，定係同轉投巴塞嘅傳聞有關。
雖然尼馬仲未知係咪真係會返巴塞，不過PSG體育總監李安納度喺接受《巴黎人報》訪問嗰陣話，如果有啱嘅報價，尼馬就可以走。李安納度話︰「如果有啱嘅報價，尼馬可以離開PSG。我哋目前冇收到任何報價，但曾經同巴塞隆拿接觸。」