前日舉行嘅九龍大遊行，部份示威者晚上轉戰旺角，警民又對峙。網上一段片段就顯示，喺旺角匯豐總行對開行人路，警員同示威者發生衝突期間，有警員向示威者爆粗呼喝：「咩呀，認X住我呀！」「隻揪吖！」成為網上熱播片段之一。
網民排隊「跟機」
見到呢個警員連執行緊職務，都不忘四圍叫人同佢隻揪，好多網民躍躍欲試，想同佢揪番場，平日有做開健身嘅人民力量議員慢必陳志全，噚日就喺facebook話，知道好多市民都想同呢位警員隻揪，但佢就叫大家唔好同佢爭，「我會去信警務處處長，應約隻揪」。
慢必話呀，自己未必打得贏呢位警員，但希望全世界可以睇到香港警察驅散示威者時，喺眾目睽睽下，如何刺激群眾情緒、知法犯法，公然違反《公安條例》，挑釁市民打鬥。佢呼籲網友如果知道呢位撩交打警員叫乜名同幾號冧巴，可以話聲佢知喎。八方就好奇，有巿民應邀同呢位警員隻揪，唔知呢位阿Sir又敢唔敢應約？冇理由講就無敵，人哋去埋信畀一哥應約就縮埋吓嘛？又唔知呢位警員會否出示委任證？
李八方