盧海鵬、游學修、盧巧音和陳穎欣等，昨日在荃灣出席ViuTV新劇《仇老爺爺》記者會。游學修今次自編自導自演，他表示劇組日前到帛琉取景一星期，其間更有機會與鵬哥一起飛車。問到他有否被鵬哥「試咪」？鵬哥聞言即說：「『試咪』就梗㗎啦！不過呢個孫得，有鬧有讚啦！」
擔正有壓力
鵬哥笑說：「撈咗成世戲，𠵱家先擔正。」游學修則指鵬哥是不二人選：「近年先有『廢老』、『廢青』呢啲詞語，有人支持後生，有人支持老人家，但其實兩爺孫最後唔通要殺咗大家咩？」鵬哥笑說擔正變得有壓力，他說：「以前唔係擔正，我話之佢死吖。」
對於會否再拍續集，鵬哥坦言未知，是怕辛苦？鵬哥表示：「辛苦就冇乜所謂，我捱慣，問題係自己做唔做得嚟。初初唔習慣唔知佢哋想搞乜，瞓幾轉覺都未埋位，我咪拍枱走囉。」游學修即解畫：「嗰日因為日景轉夜景，燈光打得慢，佢恰咗一陣，以為自己恰咗好耐，一起身見仲set緊機就嬲，我即刻roll機，叫副導演𠱁佢，好彩之後場戲講我哋鬧交。」
為健康戒煙
鵬哥就指：「咁樣拍法，20集呀，拍一個鏡頭就咁，你話拍到幾時，唔知條命有冇咁長。」鵬哥指大家當時只是開工第一日，並不了解對方：「大家要溝通，你要慢就要同我講聲，唔好聲都唔聲，嗰陣時我仲食煙，你唔畀我食煙，我又唔拍㗎！不過我𠵱家因為身體問題，戒咗半年有多。」
在劇中飾演鵬哥「新抱」的盧巧音，表示知道鵬哥曾嬲到拍枱走：「小朋友，同我爸爸媽媽一樣，要𠱁，不過有個長輩喺現場督促，好快知道邊度有錯處。」盧巧音直言拍完這套劇之後，更珍惜與家人的相處。
採訪：黃曉妍
攝影：陳俊強