曼聯中場保羅普巴之前喺出席活動嗰陣，曾大爆自己係時候要改變，佢嘅經理人拉奧拿近日仲透露，游說緊紅魔放人，又話普巴想走嘅係人所共知。不過星期日朝早，有英媒發現普巴返咗曼聯嘅卡靈頓訓練場報到，仲入選咗曼聯28人嘅季前熱身賽東征名單，唔通普巴又轉軚留隊？
家陣26歲嘅普巴，上星期仲喺美國紐約度假，因為佢喺上季季尾代表法國國家隊出戰，有額外嘅休息時間，所以比佢班隊友遲一星期歸隊，星期日朝早由司機揸車，送佢去卡靈頓訓練場。
之後曼聯就公佈28人東征名單，除咗迪基亞、拉舒福特、新兵雲比沙卡同丹尼爾占士外，盛傳將會轉會嘅盧卡古同普巴都有份入選，大軍喺星期日較後時間登機去澳洲，會喺今個星期六同澳職球隊珀斯光輝踢首場熱身賽，下星期三繼續喺澳洲同英冠球隊列斯聯交手；之後會到新加坡對國際米蘭，同埋去中國嘅上海鬥熱刺，最後就會返去歐洲，下月三號喺威爾斯對AC米蘭。