每月羅霖要孭起逾十萬養家，當然要生財有道。她除了做幕前演藝工作，又學做生意，代理洋酒和入股美容院，她說：「以前喺亞視做節目，我出埠採訪過一啲酒莊，同一個酒商好啱傾，於是就拎六位數字學吓做生意，到𠵱家賣酒都賣咗六年。」羅霖愛喝紅白酒，她續說：「公司品酒師有教我點揀靚酒。」她覺得喝酒是一門學問：「我有興趣品酒，但𠵱家冇時間，等我遲啲半退休，我就想去讀番啲唔同課程，我爸爸傳統覺得女仔將來嫁人，我18歲中學畢業就出嚟做空姐，大學都冇讀過。」
美容院生意方面，羅霖半年前同樣入股六位數字，她說：「拍檔見我保養得好，邀請我入股。」羅霖指兩門生意已回本：「做單親媽咪真係唔可以只做單一行，咁係唔足以養活一家，有機會就要把握，我都係離婚後先學做生意，邊做邊學，但我係百分之二百投入去做。」