香港青年人反共者多，自2014年佔中之後，示威者愈趨年輕，中間原因為何？政府、中聯辦與建制派不敢深入探討，只貪圖便利與懶惰，一於輸波賴地硬，董建華嘆息通識教育失效，愚忠梁美芬更聲言要檢討通識課程，點知特區政府教育局透過首席助理秘書長，指通識課程培養激進年輕示威者之說，並無真實證據，呢位AO認真唔識政治正確，以後會畀副局長蔡玉蓮𥄫到實，祝佢好運啦。
一位老友傳來一則卡通短片，話：「幼稚園便洗腦」，原來係透過卡通片宣揚「反送中」，真係有創意才諗得出，於是回覆老友：「左丁山未見過年輕創意人物會親建制嘅！」建制派之海報及宣傳單張，通常好老土，唔夠生動，更談不上活潑，點吸引年輕人呀？如之前講過，電腦設計師話畀左丁山聽，年輕creative人員根本討厭建制派，唔肯為政府及西環服務，建制派在宣傳創意方面，幾難追上年輕人陣營。
建制派話外國勢力干涉，向學生洗腦，其實唔錯得晒，因為香港兒童自林鄭月娥嗰代人開始，已習慣自小看卡通片，而且係英語卡通片，到楊岳橋一代，芝麻街卡通風行一時，幾十年來，和路廸士尼卡通不斷向香港及亞洲兒童洗腦，宣揚西方民主自由意識，連到中國民間故事花木蘭都係和路迪士尼拍得好過中國電影公司。千禧年後出生嘅孩童，更西化得厲害，近十年八年，Frozen及Peppa Pig席捲全球，美帝英殖用心不良，透過幼稚園卡通大肆宣揚西方價值，但香港人怕輸在起跑線，即使湯家驊，都怕阻止唔到孫兒孫女睇Peppa Pig，唱Elsa呀嗎？我家中孫兒未夠三歲，睇Peppa Pig就笑，就學曉一唔鍾意，就講「stay away: I don't want this」……十分有獨立性格。
林鄭及楊潤雄局長面對外國勢力卡通向全香港幼童洗腦，計將安出？請電視台全部播北京製作兒童節目？全面禁播禁售Peppa Pig、Elsa紀念品呀？中國華為可以生產5G硬件，但中國冇一間公司可以砌低迪士尼或英國卡通，原因何在？因為講科學，中共可以全力催谷，但講創意思維，中共則全力箝制，電影、書本是要配合黨中央路線，不得妄議，不得有獨立的精神、自由的思想，一定要聽黨話，跟黨走。如此環境底下，文宣人員只懂黨八股，何來創意？在文化宣傳方面，中國創意一敗塗地，香港孩子自兩歲開始，都自願受美帝洗腦啦！