馬國明、唐詩詠與李佳芯（Ali）噚日喺紅磡宣傳新劇，前日馬明表態與黃心穎做回「朋友」，唔少網民希望佢同劇中飾演離婚夫妻嘅唐詩詠，現實都成為戀人，認為城中筍盤與絕世好女友好襯。馬明接受訪問時笑言：「之前我哋都怕會有兄妹感覺，幸好大家後來都好鍾意佢哋，好開心大家都好投入。」
「諗唔到差啲乜」
提到網民想馬國明同唐詩詠現實中拍拖，成為真情侶，唐詩詠即笑言叫馬明約佢，而有觀眾留言最好的已在身邊，直指就是詩詠，馬明就話：「咁犀利！咁佢不嬲係好嘅，係好女仔。」問到佢哋相識多年撻唔着，馬明就不禁冷笑，記者再問二人差啲乜嘢？馬明話：「我都諗唔到差啲乜。」詩詠更希望可以拍續集，佢話：「我覺得套劇嘅角色都仲有好大空間發展，因為都未講我同馬國明點解離婚，其實監製都有傾過嘅。」
Ali斥黎諾懿賴皮
此外，Ali之前同黎諾懿拍攝節目，被對方爆佢發脾氣，Ali表示自己平時脾氣很好，因為拍劇冇時間瞓先會容易躁，所以搵咗黎諾懿做「出口」：「可能冇人試過咁樣對佢，佢就咁大反應。」講到二人即將再合作，Ali笑言：「我唔會再同佢溝通喇，因為呢個人好賴皮。」
撰文：馮仁昭
