每次有大型遊行或者集會之後，主辦單位點算巿民嘅參加人數，都同警方差一大截，例如今年六四30周年燭光集會，明明維園逼到滿，大會公佈人數超過18萬，但警察話得6.5萬；又好似6.16大遊行，民陣話有200萬，警察話得33.8萬。建制派、藍絲、甚至連北京都話主辦單位吹大個數，警察個數先堅，但警察個數究竟點計出嚟？從來冇詳細交代，不過噚日有網民喺twitter上載一條疑似警察點算尖沙嘴遊行人數嘅片段，八方睇落點算方法真係相當兒戲。
網民：同亂吹冇分別
網民Alex Hofford喺佢twitter上載一條應該係尖沙嘴中港城平台拍嘅片，先係影住出面遊行隊伍，然後慢慢轉向一個女警，佢隻手拎住一個最原始嘅人手計數器，睇住遊行隊伍，大概每秒鐘㩒一下，其間又不時望向拍片人，好似好驚被人影咁，之後鏡頭拉遠，佢着住印有「警察」字樣嘅背心，極可能係點緊遊行人數。
問題係鏡頭影到街上面有一眼都睇唔晒嘅遊行巿民，但呢位師姐就慢慢㩒，真係行咗10個人㩒唔到一下，咁點人數法，真係100萬人都變一萬幾千啦！難怪條片貼上連登後，俾成班網民恥笑，話個計算器個掣叫「毅進掣」，又話「黐孖筋 咩年代 仲用手數」、「咁count法同亂吹個數出來，係無分別嘅」，所以建制、藍絲下次話民陣吹大遊行人數時候要記住，警察點人數方法其實仲兒戲。
李八方