98年馬來西亞環球小姐冠軍尚羚（Sherine），由選美踩入香港模特兒界，再實現當歌手的夢想，成為爵士樂歌手，去年更推出了她的處女Hi-Fi發燒碟，三年多前尚羚嫁到香港，與樂隊RubberBand隊長馮庭正（阿正）結婚，二人從相識、拍拖到結婚，都是由音樂結緣。
採訪：羅慧敏
攝影：陳俊強
原名黃淑玲的尚羚由選美出身，最終踏上音樂路成為歌手，同時跟馮庭正（阿正）譜出一段美滿婚姻。早前他們兩夫婦接受《蘋果》訪問，大談二人由相識到結婚的經過。
雷頌德做媒人
阿正直言二人的相識，是因為太太想唱歌，他說：「識佢就係因為佢想唱歌，佢當時想翻唱我哋首《Simple Love Song》，係Mark（雷頌德）唔睬佢，彈咗我哋畀佢，可能佢出嘅錢唔夠吸引，不過好彩Mark唔肯做，我哋先識到。我哋第一次見面係喺錄音室，我着住T恤短褲，佢就冇乜打扮，開頭都唔敢望佢，第一眼睇佢就冇乜特別，知道係靚女，但係之後見多咗，就越睇越靚。」談起相戀經過，坐在身旁的Sherine不時甜笑，她說：「一定係音樂先識到，當時當然係佢做主動啦！我覺得佢好有心幫我做好首歌，由嗰陣時開始就做好朋友，一路變熟。」
阿正直言不懂爵士樂，但為Sherine籌備出碟與演出的同時，阿正也從香港頂級的爵士樂手合作中學習，他說：「每個人都有夢想，自己要選擇自己去行呢條路，還是選擇有人同你一齊行，呢個好緊要，就好似我想考滑雪嘅教練牌，想咗十幾年，佢可以支持我，對我嚟講好有意思，人生裏面仲有好多個唔同夢想，佢好想做歌手嘅，我就盡我能力去支持。」
支持對方圓夢
拍拖三年、結婚也有三年多，阿正與Sherine覺得「支持」二字最重要，Sherine說：「佢有一個夢想，就係想攞到滑雪嘅教練牌，講咗好多年，我好支持佢，陪佢去新西蘭考咗個牌，當時明白到對另一半係要互相支持，就好似佢支持我做歌手，啲人會話我好儍，咁遲先去實現夢想，我覺得唔關歲數事，只要身邊有一個人去支持你想做嘅嘢，係好有意思。」
去年，阿正出錢出力當監製包辦太太的唱片，現時他們正籌備第二張大碟，並已分別在荷蘭及紐約錄製六首歌曲，問到今次阿正是否出資支持？他笑說：「今次唔好搞我喇！我覺得自己真係好多嘢唔識，留番畀啲大師，我負責聯繫冇所謂，佢哋係頂級樂手，我要行埋一邊。」現時除了音樂，他們正積極造人，阿正說：「我哋二人世界咗三年，差唔多可以去下一個階段，已經計劃有小朋友，一切隨緣。」Sherine爆老公恨生小孩，而他們更夢想將來小朋友的模樣，Sherine說：「如果生個BB會教佢彈琴，老公彈結他，我就唱歌，有個組合。」
