荷蘭翼鋒35歲嘅洛賓，今夏約滿離開效力咗足10年嘅拜仁慕尼黑之後，周四宣佈掛靴，原因係有心無力，「我個心仲想繼續，但身體就話唔好（My heart says yes, my body says no.）」所以好無奈咁結束咗19年嘅職業生涯。
一直受肌肉傷困擾
格羅寧根青訓出身嘅洛賓，喺母會成名後02年去咗燕豪芬，踢咗兩季去車路士，贏過兩次英超，喺車仔3季之後就去到皇家馬德里贏咗1次西甲，再多兩季去到拜仁，踢足10年掃走8個德甲，另加12/13嘅歐聯冠軍，洛賓都曾經96次代表荷蘭入37球，係2010世盃亞軍嘅主力，當年洛賓喺決賽對西班牙錯失幾次單刀飲恨輸0:1。不過，洛賓嘅職業生涯一路同肌肉傷患結緣，由踢車仔開始，未試過有一季聯賽踢多過29場。
列貝利繼續歐洲搵食
洛賓喺聲明表示：「呢個係我職業生涯最艱難嘅決定。我個心想繼續，但身體話唔好。」左腳踢右翼，開展內切翼鋒潮流嘅洛賓，一招「洛賓的軌迹」足夠橫行歐洲。離開拜仁後，一路有傳洛賓可能去中超或美職掘金，又傳佢想返格羅寧根，但佢最後係掛靴。冇咗洛賓，今夏一齊離開拜仁嘅「Robbery」另一半列貝利，就話自己唔退休住，仲收到好多歐洲球會嘅邀請，兩星期內會有決定。