近日有不少舞台劇工作者發起杯葛行動，呼籲同業公開抵制高志森及其所屬的春天舞台，兼在facebook廣傳：「永不做春天！永不幫高志森！做個真正的演藝工作者！」
莊梅岩：欺凌新人
曾五奪香港舞台劇獎最佳劇本、電視劇《短暫的婚姻》編劇莊梅岩亦響應行動，前日在facebook點名炮轟高志森，她以「其實從來都冇諗住再合作，所以冇乜杯唔杯葛。」作為開端，撰寫了一篇長文：「斂財、霸道，最鍾意欺凌剛出道同冇選擇嘅人，自己同人講版權就要追broadway standard，人哋同佢講版權就話行裏面冇呢種規矩，佢無恥嘅言論同行為，罄竹難書，我身邊就有好多瀨過嘢嘅同業。」
莊梅岩續道：「張國榮喺電台都鬧過佢啦，但係佢勝在乜嘢呀？面皮夠厚，人哋死咗佢照攞人哋啲歌人哋嘅名氣照呃飯食；攞住老本同舊時剝削返嚟嘅經典招搖撞騙，睇死嗰啲念舊嘅人唔敢同佢反面，呢啲扮人嘅蛆，我望一眼都不屑。」
莊梅岩坦言不會責怪為高志森工作的人，只怪自己能力不高，沒有太多的工作機會給大家，最後她說：「關政治立場乜嘢事呀？未有顏色之前已經割席啦，唔係善惡都唔識分嘛？我係講緊佢呀，高志森吖嘛。我係make stupid people famous呀，so what?#響應謝冰盈運動」。
記者向莊梅岩了解，她以英文短訊回覆說：「只因演藝師妹建議杯葛春天舞台，我諗我應該發聲。」而高志森未有回覆。
茜利妹：我領教過
藝人茜利妹昨日在facebook也就莊梅岩所講發文斥高志森，指自己多年前與高合作時曾中招：「十幾年前幫佢同佢條女做過一次嘢領教過……白紙黑字簽晒嘢都照恰！其實當年嬲到網上公開爆過，捐嗰少少錢要人感恩、平價同佢做嘢成名嘅artist又要人感恩，最鍾意𠱁啲會為佢免費宣傳嘅老人家，畀餐飯錢就覺得自己做咗聖人、繼續自我感覺良好。」
《蘋果》昨日聯絡茜利妹，她解釋事發於09年，當時焦媛實驗劇團演出舞台劇《陰道讀白》：「低生（高志森）係做監製，當時佢重演想有新元素，打算喺舞台劇演出前播錄像，搵咗包括我在內嘅幾個女性創作人合作，我哋自己寫劇本同拍咗錄像，畀佢先播錄像再演劇。」
茜利妹有經驗，合作前先同對方公司要求簽合同：「我已經好醒，知要簽agreement，同佢公司對頭人講，淨係畀呢次演出，下次要用要同我right。」
違約偷偷重用錄像
隨後，因為《陰》劇其後有很多演出場次，茜利妹初時不以為然，直到有朋友看完演出讚她錄像爆笑，因為早講明錄像只作一次性用，故茜利妹不忿：「唔係呀嘛，其實話咗係一次，講緊係簽晒嘢。唔係我唔去睇就冇人睇，佢覺得冇人會報寸咩？真係奇怪。你用唔緊要，你知會我吖，我都唔會唔畀用，片都拍咗啦。但禮貌上、工作上你都要知會吖。呢個係公開演出，但就好鬼祟做呢件事。」直至《陰》劇在星馬演出，茜利妹當地朋友再次向她分享爆笑錄像，令茜利妹決心在fb、微博鬧爆，對方才道歉，並支付演出費，但茜利妹覺得冇癮，將收入捐給慈善機構。
採訪：李森、魯吉