車路士歷史上最偉大球員之一、41歲嘅林柏特周四正式回歸車仔做領隊，簽約三年。得一年教波經驗嘅林伯，雖然喺車仔地位崇高，不過家陣車仔有轉會禁令在身，王牌夏薩特又已經走人，上季靠用小將成名嘅林伯又拆唔拆得掂呢個局呢？
林柏特2001至14年效力車仔，上陣648場係球會歷來第4多，入211球就係歷來最多，佢就話好開心返嚟做領隊：「我非常驕傲可用主教練嘅身份返嚟，大家好清楚我對球會嘅愛，同埋我哋一齊經歷過嘅事，我會全力準備新球季，盡力帶領球會走向更遠大嘅成功，我好心急想開工喇！」今夏車仔已經有施治返嚟做技術總監，家陣林柏特都回巢，球隊總監加蘭諾芙斯基亞就表示：「林柏特上季第一次做領隊，都展示佢係新一代少帥中出類拔萃嘅嗰個。」
轉會禁令所限新兵得雙錫
林柏特曾為車仔贏得3次英超、4次英足盃、2次英聯盃，歐聯及歐霸各1次，17年2月效力紐約城時宣佈掛靴，18/19球季喺打比郡首次教波，拎到英冠第六名，躋身升班附加賽決賽，可惜1:2輸畀阿士東維拉升唔到班。雖然林伯功勳卓著，但車仔受轉會禁令所困，今夏同明年一月兩個轉會窗都唔准註冊新兵，目前仲同緊體育仲裁法庭上訴，到家陣就只係買斷咗借將高華錫同埋一月已經簽定嘅翼鋒基斯甸普列錫，所以喺夏薩特離隊下，林伯最大考驗就係點用一班年輕球員去填補夏神出走嘅空缺，今季仲要踢足包括歐聯在內嘅四條戰線，唔同上季踢歐霸可以全部用副選。
善用小將望頂替夏薩特
家陣車仔中後場問題唔大，夏薩特個位暫時就要睇吓美國國腳基斯甸普列錫夠唔班頂上喇，如果唔得就要靠新星赫臣奧杜爾，但呢位18歲小朋友上季尾阿基里斯腱受傷，未必咁快踢到，如果佢兩個都唔掂，就要靠晒舊將韋利安同柏度洛迪古斯。
好彩，Opta數據就指出林伯上季教打比郡，派出U21球員嘅時間冠絕英冠，當中上季借去打比嘅車仔小將美臣蒙特同湯姆利都好受重用，難怪上季借咗去維拉嘅車仔前鋒譚美阿巴謙一早已經話好期待，仲話林伯上任就係佢哋呢班年輕球員嘅表現時間！