【銅鑼灣→大坑】成軍8年的男子組合C AllStar，完成前年紅館騷後宣佈休團，四子各有發展，其中有「拉麵哥」之稱的何建曦兼任飲食KOL 、作家等多重身份，久未露面的他，日前孖女友拍拖覓食，由銅鑼灣行到去大坑，揀了10幾間才揀到心水餐廳，看來對食的要求好高，不愧是飲食KOL。
逐間研究
當晚約8時許，拉麵哥和圈外女友拍拖現身銅鑼灣，着露肩兼露臍裝的女友身材嬌小，兩人在時代廣場附近搵地方醫肚，行經每間餐廳都停步，細看門外的餐牌和內裏環境，大約睇了6、7間，但都揀不到心水餐廳，最後行到去大坑，又再沿途看了幾間餐廳，最後才揀中一間上樓西餐廳。
甜蜜爆燈
拉麵哥和女友由銅鑼灣行去大坑，沿途如果街上途人較多，兩人表現都有點避忌，刻意保持一、兩個身位距離，不過在等過馬路時，女友終於按捺不住，靜雞雞將手伸在背後跟拉麵哥玩拖手仔，甜蜜指數爆燈，而每當行到人少少的地方，拉麵哥便會和女友搭膊頭及拖手仔，做回情侶的指定動作。
採訪、攝影：梁繼光、羅德光