周三美洲國家盃四強爆出大冷門，智利以0:3大敗畀秘魯，力爭三連霸夢碎。秘魯喺上半場21分鐘先開紀錄，踢到38分鐘再因為智利門將艾利亞斯一次嚴重犯錯而拉開比數。當時秘魯長傳到右路，艾利亞斯無啦啦棄關而出，跑到出禁區外邊線位置想解圍，但佢截唔住個波之餘仲俾對方傳到中，由約斯馬約頓射入空門。秘魯換邊後繼續主導形勢，去到補時一分鐘靠老將荷西古里路單刀建功贏到三球。智利都唔係冇「破蛋」機會嘅，佢哋之後博到12碼，但伊度亞度華加斯居然挑射，俾秘魯門將單掌拍出再接實，最終以0:3大敗出局。至於早前以為翻生嘅阿歷斯山齊士今場打回原形，全場得兩次射門，成功傳球都只得36次，就好似失咗蹤一樣。