《蘋果日報》噚日頭版「開天窗」，吸引到好多讀者關注，唔知《蘋果》為乜要整個「開天窗」頭版？其實呢個頭版係想帶出「當新聞自由被無理打壓」訊息，希望讀者支持《蘋果》噚日正式全面落實嘅訂閱計劃，但估唔到讀者、網民創意無限，實行「自己頭版自己登」行動，創作不同反送中、反白色恐怖嘅《蘋果》A1！
最先發起嘅係fb群組「Tai Po 大埔」，有網民發帖話係白色恐怖下，市民更應發聲！所以搞「自己頭版自己登」行動，呼籲喺白色恐怖下，繼續發出訴求，發帖人自己貼咗張寫上「【怨有頭‧債有主】麻木月娥須正面回應訴求」《蘋果》頭版，下面再畫個血口罩，代表示威者俾差人打到嘔血，又喺原句「當新聞自由被無理打壓……」後續了「市民更應發聲！」，並畫上一個染滿鮮血嘅口罩，相信係為7.1示威者佔領夏慤道後，被防暴警員驅趕而被打傷嘅一種控訴。相中又可見到，拍攝頭版嘅背景仲要係被稱為「門常開」嘅政府總部，唔少網民都留言讚有創意，又苦中作樂咁話：「第一屆蘋果頭版設計比賽正式開始」，希望可以「遍地開花」。
程展緯漏夜參賽
之後有其他網民分享「作品」，有上面寫有「還我HK」、「尚餘28年香港應有嘅權利」，《蘋果》fb亦玩埋一份，發起「我的A1頭條」行動，呼籲網民將自己創作嘅A1頭條照片上載，短短幾個鐘已有好多網民上載佢哋設計嘅A1，形形色色乜都有，連早前趁林鄭出席《明報》酒會，同另一位藝術家黃宇軒向林鄭高舉「撤回惡法」標語抗議嘅藝術家程展緯都喺佢fb加入，佢用月亮與黑夜做主題，話縱使天仍黑，但每個香港人可以成為柔和月亮，照亮香港。
雖然今次「我的A1頭條」行動係冇獎品，但八方問過《蘋果》非正式但絕對專業同民主嘅評審團，究竟邊個A1最好呢？經過民主過選特首嘅評審程序後，大家覺得程展緯嘅作品，同埋「白色恐怖 你有你做 我地香港人未淆過」兩個A1最好，唔知讀者又點睇？
李八方