根據西班牙《阿斯報》嘅報道，呢個夏天冇入選到巴西國家隊美洲盃大軍名單嘅皇家馬德里球星馬些路，家陣就同屋企人一齊返咗巴西鄉下里約熱內盧度假，不過佢星期一晚就涉嫌醉酒駕駛被當地警方攔住咗，當警察叫馬些路接受俗稱「吹波仔」嘅酒精呼氣測試嗰陣，佢居然唔肯喎，寧願畀大約675歐元嘅罰款了事。隨後當地警方向傳媒交代呢件事，就話已經扣押咗馬些路嘅駕駛執照，仲會罰佢喺巴西停牌一年。《阿斯報》仲話，馬些路今次已經唔係第一次因為駕駛問題而惹麻煩上身，2013年嗰陣佢曾經因為無視路牌，結果夾夾埋埋被人扣晒分，被馬德里警方取消咗佢個駕駛資格。