已故名伶新馬師曾鄧永祥遺孀洪金梅日前離世，享年78歲，鄧家前晚出訃聞，指祥嫂喺2019年7月2日於養和醫院離世，下周四（11日）喺香港殯儀館福海堂設靈，翌日上午9點半舉行大殮儀式，遺體隨即移往歌連臣角火化。噚日朝早11點，鄧小艾同鄧兆榮身穿黑色素服現身永祥大廈，出發為媽媽辦理後事，對於黃夏蕙表示祥嫂生前曾經講過，希望安葬喺永祥苑嘅荔枝樹下，問番小艾呢件事，佢話：「呢啲遲啲先講。」
選靈堂花
再問點解呢兩日唔見大哥鄧兆尊？小艾就話各有各做。之後佢哋去咗銅鑼灣，原來係會合兆尊，小艾話：「今日主要係揀靈堂花同棺木。」兆尊表示喪禮會以西方儀式進行，問到祥嫂嘅安葬地點？小艾話：「稍後會公開宣佈，大前提係搞好媽咪嘅事先，你哋叫番我翠玉（本名）啦。」
跟住佢哋一行三人去咗北角一間花店，為亡母揀選靈堂花，三人逗留花店近40分鐘後離開，兆尊透露：「都係啲普通嘅款，白色啦。」
珍惜相處
講到有冇打算安排祥哥與祥嫂合葬？兆尊話：「我諗唔係咁容易，又要起又要鑿爛嚿雲石。」祥嫂生前曾經講過，叫兆尊不要結婚？佢就話：「唔係正式講，講吓笑箒。」係咪祥嫂對三位女友唔係咁滿意？小艾話：「唔好講呢啲，主要都係講番媽咪嘅後事，大家正面啲啦，爸爸又走咗，得媽咪一個，想做得好好睇睇。」
之後佢哋去咗香港殯儀館揀棺木，兆尊同小艾再次受訪，問到媽咪有冇遺願？佢哋話：「媽咪話諗住出院嗰陣，想同我哋食嘢，佢好珍惜同我哋相處時間。」至於祥嫂遺產嘅傳聞，兆尊話：「我冇睇，傳聞嘅嘢問番傳嗰個人啦。」佢仲話：「𠵱家社會有啲扭曲，希望大家對屋企人好啲，始終都係媽咪。」
至於身在美國嘅黃夏蕙噚日接受電話訪問時話：「因為喺美國嘅行程同工作改唔到，下周趕唔切返嚟送別祥嫂，呢幾日我瞓唔到，好傷心，我無權去干涉佢後事，但係好希望佢啲子女可以幫佢完成葬喺荔枝樹下嘅心願。」
撰文：馮仁昭