建制陣營借示威者衝入立法會大做文章，有團體排住隊去政總撐政府同差人，建制派議員亦藉機不停喺立會大樓外開記招，不過政府似乎唔係好重視佢哋，甚至見都唔係幾想見，好似藍絲陣營珍惜群組噚日拉隊去政總撐警，等嚟等去竟然冇人接信，搞到撐政府變怨政府。
珍惜群組噚日拉隊去政總撐警，要求設立辱警罪，一行十幾人喺閂咗門嘅「門常開」外高叫口號，叫完一輪，當然要向保安局代表遞請願信先收工，點知叫極都唔見保安局人員，八方現場見到負責人不停開咪問：「保安局代表到咗未？我哋和平守法，都要有人接信喎！」仲一度叫在場警察代為接信，但都係冇回應。搞成咁，成班藍絲冇得收工要OT又唔會有補水，梗係唔高興，於是負責人再重複一次訴求，先有局方代表趕到接信。嘩，咁大膽阻住佢哋遲咗收工，保安局代表因住被狙擊呀。
市民粗口問候
藍絲等緊收工期間，附近好多市民分頭狙擊呢啲建制派，好似經民聯梁美芬就俾市民鬧到龜縮入立會大樓，而珍惜群組一樣俾市民係咁鬧，仲要咁啱遇上食飯時間，政總對出天橋上有唔少打工仔駐足觀看，仲有打工仔細細聲鬧：「戇X！」可能佢哋都知要改變施政風格嘅特區政府好忙，如果冇百萬人上街、就算係愛國愛港藍絲，都唔使旨意政府會有「聲明」回應，有市民仲忍唔住開口回應撐警人士：「人在做，天在看！」
李八方