【本報訊】經歷自殺、出走，在異地神父輔導下，Teresa輾轉重返教會；然而她在訪問中特別提到，傷她最深的還有知情的教友和修女，他們的反應令Teresa一度對教會感絕望。教友們不單質疑她「誇張」、「作嘢」，甚至有人說，「你生得咁靚，又夜晚搵佢，唔怪得佢」，卻從來沒有一個人提出陪她申訴報警。
主任司鐸：當人生小插曲
Teresa指當時神父L在教會極有名氣，令她事發後一直猶豫是否向人透露被性侵，「嗰時唔想講畀咁多人聽，又唔識搵輔導、社工」。相隔數個月後，她才和當日同行的周小姐（化名）和數名教友、修女講述事件；當時教友的反應幾乎一面倒，「話『有冇咁誇張呀？神父唔會咁樣』，或者講『你又唔係金身，摸吓有乜所謂？』」甚至有人說，「你生得咁靚，又夜晚搵佢，唔怪得佢」。
其堂區主任司鐸T知悉事件，則着Teresa「忘記事件」、「當係人生嘅小插曲」，又指「佢唔承認得，如果佢認，就要唔做神父要娶你」。
身邊人的態度，令Teresa陷入極度抑鬱，「唔講得畀教外人聽，講畀教內人聽，冇人信我，掉返轉頭鬧返我，因為當時佢喺教會好紅」，她指教友「唔係幫助我嘅人，而當我係敵人」；雖然有教友安慰她，「天主會懲罰佢，唔使喺呢世，會搵返個公道」，但沒有人建議過她報警或向教會舉報。
其他朋友只有少數人支持她向教會舉報，有人則質疑她事發時不大聲反抗；Teresa解釋事發時情況太混亂，雖然有閃過大力反抗的念頭，但沒有付諸行動，「嗰個年紀，會當神父係父親、師父，事發時太過驚嚇，唔知點反應；如果一嗌出嚟，啲神父出晒嚟，我會好醜，佢會好醜，好擔心佢會冇得做神父」。
外地神父痛心 代鞠躬道歉
事件後Teresa移居他鄉，在當地大學完成學士和碩士課程，她初時拒絕教會生活，只參與彌撒，「只要見到神父都會諗起件事，覺得好頭暈」。隨着時間過去，一次她和當地神父Y閒談，對方問她不再積極參與教會活動的原因，Teresa把事件和盤托出，神父Y非常憤怒和痛心，「佢話一個人唔好，唔代表所有人都唔好，正式喺我面前鞠躬，代表所有神父向我道歉，講對唔住」。
異地夜深，Teresa和記者在街頭分別，特別叮囑記者要提教友擦亮眼睛；她之所以站出來不是為了傷害教會，而是防止更多人受前神父L傷害，「要畀佢知道咁樣係好反基督徒嘅態度，俾佢加害嘅人，一生改寫；佢冇悔改，係完全違反基督價值觀同埋精神」。
■記者張嘉雯